فرەیان هانە هەرێم کوردستان.. کووچبەری لە پەرلەمان هەشمار ئاوارەیل ناو عراق ئاشکرا کەێد
شەریف سلێمان سەرۆک دەسەگە ئەرا ئاژانس شەفەق نیوز وت: شمارەی ئاوارەیل لە ئاست عراق لە ٨٨٠ هەزار کەس رەد کەێد، وتیش: فرەگەیان ئیسە هانە هەرێم کوردستان، و لەناو و دەیشت کامپەیل گوزەران کەن، و فرەیان هانە ناو کامپەیل دهۆک ک شمارەیان رەسێدە ١٥ کامپ ئاوارەیی، و فرەیان لە ئاین ئێزدیە.
سلێمانی دووپات لە گرنگی چارەکردن باوەت ئاوارەیل کرد، باوجی تا ئیسە عراق دەسوە گامەیل کارانەیگ لە باوت ئاوارەیل نەکردگە، هەرچەن رێککەفتن لە بەرنامەگە ئەرا چارەکردن باوەت ئاوارەیل هەس، هەمیش ئەو بەڵگەنامە ک لە هاوپەیمان وەڕیەوبردن دەوڵەت واژوو کریاگە، و وەداخەو ک تا ئیسە گامەیلیگ جددی نەنریاگە.
وتیش: نووڕم ک گامە خاسەگە ک چارەی ئی گیچەڵە کەێد وەشیوەی گشتی خوەی جیوەجیکردن رێککەفتن شنگالە، و لەلای کەمەو گلەوداین ئاوارەیل، چوینکە فرەی ئاوارەیل ناو کامپەیل خەڵک شنگالن، ک جیوەجیکردن رێککەفتن شنگال بەش گەورەیگ لە گیچەڵ ئاوارەیل سووکەو کەێد، و ئەگەر رێککەفتن شنگال جیوەجی کریا، قەیران ئاوارەیل وە ریژەی ٨٥٪ چارەسەر کەیمن.
