عراق چوارەمین گەوراترین دابینکەرەیل نەفت ئەرا کۆریای باشوورە ماوەی 2026

شەفەق نیوز- بەغداد

داتایەیل فەرمی کۆریا، ئمڕوو سێشەممە، نیشان دان کە عراق هاتە پلەی چوارەم لەناو گەوراترین دابینکەرەیل نەفت خاو ئەرا کۆریای باشوور ماوەی نیمەی یەکەم لە ساڵ 2026، وە بەشیگ کە رەسیە 7.4% لە کۆی گشتی هاوردەیل نەفتی وڵاتەگە.

 وەپای داتایەیل یەکێتی نەفت کۆریا و دامەزراوەی کۆری ئەرا نەفت، کۆریای باشوور 467.12 ملیۆن بەرمیل لە نەفت خاو هاوردە کردگە ماوەی شەش مانگ یەکەم لە ساڵەگە، وە کەمەوبۊنیگ وە ریژەی 8% لەبان بنەمای ساڵانە، لە وەختیگ بڕ هاوردەیل وە ریژەی 8.1% ئەرا 41.36 ملیار دۆلار بەرزەو بۊ وە ئەنجام بەرزەوبۊن نرخەیل جەهانی نەفت.

 سعودیە کەفتە نوای لیست دابینکەرەیل وە بەش 30.5%، و دۊای ئەوەیش ویلایەتە یەکگرتگەیل وە ریژەی 20.5%، کە یە یەکەمین جارە بەش نەفت ئەمریکی لە 20% لە هاوردەیل کۆریای باشوور رەد بکەێد ماوەی نیم ساڵیگ، و دۊای ئەوەیش ئیمارات وە ریژەی 15.1%.

 عراق وە پلەی چوارەم هات وە بەش 7.4%، و کەفتە نوای کوەیت کە بەشەگەی رەسیە 4.9%.

داتایەیل نشان ئاڵشتکارییگ دیار لە نەخشەی دابینکردنەیل نەفتی کۆریای باشوور دەن، کە بەش نەفت خوەرەڵات ناوڕاس لە 68.7% ئەرا 62.3% کەمەو بۊ لەو ماوە، هاوەخت وەگەرد شوینەوارەیل بەسانن تەنگەی هورمز و ئەو شیویایەیلە کە کاریگەری لەبان دابینکردنەیل نەفت لە ناوچەگە داشتن.

لە وەرانوەر ئەوە، بەش ئەو نەفتە کە لە هەردوگ ئەمریکاوە تیەێد بەرزەو بۊ ئەرا 26.5% وەراورد وە 23.4% لە نیمەی یەکەم لە ساڵ گوزەشتە، هەمیش بەش نەفت ئەفریقی ئەرا 5.6% و ئاسیایی ئەرا 5.5% زیای کرد.

 بەش عراق کە رەسێدە 7.4% چۊ نیشاندەریگ لەبان وەردەوامبۊن گرنگی نەفت خاو عراقی لە بازاڕ کۆریای باشوور دەرکەفێد، وەگەرد ئەو شیویایەیلە کە ریگەیل دابینکردن لەڕی ناوچەی کەنداو و تەنگەی هورمز مەوقەی نیمەی یەکەم لە ساڵەگە وەخوەی دی.