عراق نیاز بیناکردن زیندان و شارەیل چاکسازی دیرێد
شەفەق نیوز/ خالد شوانی وەزیر داد عراق، ئمڕوو سێشەممە، ئاشکرای پلان وەزارەتەگە کرد ئەرا فراوانکردن زیندانەیل ئیسە و بیناکردن یەکەیلیگ ترەک نوو و شارەیل چاکسازی ئەرا چارەکردن گیچەڵ قەرەباڵغی زیندانیەیل.
شوانی لە وتاریگ وەبوونەی رووژ جەهانی راگەیانن ماف مرۆڤ، وە ئامادەبوین پەیامنێر ئاژانس شەفەق نیوز وت: وەزارەت داد وە نوینەرایەتی فەرمانگەی ماف مرۆڤ، توەنست پلان نیشتمانی ماف مرۆڤ ئەرا ساڵەیل (2021 -2025) واژوو بکەێد، تا رییگ ئەرا دامودەزگایل و لایەنەیل بکیشێد ئەرا گەشەپیدان سیستەم یاسایی نیشتمانی و ئامادەکردن سیاسەتەیل نیشتمانی ئەرا مقیەتیکردن ماف مرۆڤ لە عراق.
شوانی وتیش: یەکیگ لە ریەیل ئی ئەرک گرنگە لەی پلانە وەیەککردن قەوارەی ئیدرای ئەرا یەکەیل ماف مرۆڤ لە دامودەزگایل حکومەتی، ئەرا جیوەجیکردن تەمەی میکانیزمەیل ناودەوڵەتی.
دیاری کرد کە وەزارەتمان ئیرنگە لەپسا کار لە ئامادەکردن راپۆرت سێیەم ئەرا پلان نیشتمانی کەێد، کە دەرئەنجامەیل دامودەزگایل فەرمی هاناوی، و ئیمە باوەڕ دیریمن کە قایمکردن و مقیەتیکردن ماف مرۆڤ بایەسە وە هەڵسەنگاندن ئەو کارەیلە وەجی باێد کە ئەنجام دریانە و راسەوکردن هەڵەیل.
شوانی وتیش: ئیمە رکداریمن لە ئیدارەکردن کاروبار زیندانەیل و چاکسازیەیل کە سەردان وەردەوام بکەیمن ئەرا دیاریکردن گیچەڵەیل، و رکداری لەبان پیشکەشکردن خاسترین خزمەتگوزاری ئەرا زیندانیەیل تا زیندان و چاکسازیەیل بکەیمنە وشین دووار خاسەوکردن و دووارە بیناکردن ئایەم، وە زوورهاوردن لەبان بەرنامەیل هووکارە و یایگردن پیشەیی، کە وەپیان توەنستیمن چیرووک سەرکەفتن خاسیگ وەدەس باریمن.
وتیش: وەزارەتەگە تەقەلا دەێد کێشەی قەرەباڵغی چارەسەر بکەێد، وە فراوانکردن زیندانەیل ئیسە، و بیناکردن زیندانەیل نوو و شارەیل چاکسازی کە بنکەیل پولیس و بنکەیل تەندروسی و دادگایل پسپۆڕ هاناوی، ئەرا لەناوبردن رۆتین وەگورەی بنەمایل ناودەوڵەتی.
