عراق كەفێدە پلەی 28 لە جەهان لە یەدەگەیل کتش بیگانە وە بڕ 85 ملیار دۆلار
شەفەق نیوز - بەغداد
عراق لە پلەی 28 جەهانی هات لە ناوەین ئەو دەوڵەتەیلە کە خاوەن گەوراترین یەدەگەیل نەختینەی بیگانەن لە بنەڕەت 30 دەوڵەت کە لە خشتەگە تۆمار کریانە، وە بڕ گشتییگ کە رەسیە نزیکەی 85 ملیار دۆلار، وەپەی پۆلینکەرییگ کە ماڵپەڕ "ڤیژواڵ کاپیتاڵ ئیست" کەنەدی بڵاوی کردگە وە پشت بەسین وە نووترین داتایەیل سندوق دراو ناودەوڵەتی.
وەپەی پۆلینکەرییەگە، عراق دۊای فەڕەنسا هات کە پلەی 27 داگیر کردگە وە یەدەگەیلیگ کە رەسیە 86 ملیار دۆلار، و وەرجە رۆمانیا لە پلەی 29 وە بڕ 78.2 ملیار دۆلار، لە وەختیگ تورکیا لە پلەی 30 و دۊایین هات وە بڕ 76.6 ملیار دۆلار.
چین پیشەنگ لیستیەگە گرد وە یەدەگەیلیگ کە رەسیە 3.41 تریلیۆن دۆلار، و دۊای ئەوەیش یابان هات وە بڕ 1.259 تریلیۆن دۆلار، و دۊاتر سویسرا وە بڕ 932.3 ملیار دۆلار، و تایوان وە بڕ 602.5 ملیار دۆلار، و هیندستان وە بڕ 543 ملیار دۆلار.
لەبان ئاست عەرەبی، سعودیە لە پلەی شەشەم جەهانی هات وە یەدەگەیلیگ کە رەسیە 458.6 ملیار دۆلار، و ئیمارات لە پلەی 12 وە بڕ 251.4 ملیار دۆلار، لە وەختیگ عراق لە پلەی سێیەم عەرەبی هات لە ناوەین ئەو سی دەوڵەتە کە گەوراترین یەدەگ دێرن.
پۆلینکەرییەگە، کە لەبان داتایەیل بنکەی یەدەگە ناودەوڵەتییەیل و کاش وە دراوە بیگانەیل سەر وە سندوق دراو ناودەوڵەتی بنیات نریاگە، دیاری کرد کە یەدەگەیل کاش بیگانە نۊنەرایەتی ئامرازیگ بنەڕەتی کەن ئەرا نواگیریکردن شۆکە ئابوورییەیل، و پاڵپشتیکردن ئارامی دراوەگە، و دابینکردن پۊل ئەرا هاوردەیل و خزمەتکردن قەرزە دەیشتەکییەیل.
پۆلینکەرییەگە زەڕ لە یەدەگەیل نەختینەی بیگانە دەر کەێد، و پشت بەسێد وە نووترین ماوەیل راگەیانن وەردەس لە ناوەین ناوڕاس ساڵ 2025 و چارەگ دۊەم لە ساڵ 2026.
