عراق کەفێدە کاریگەری کەشوهەوای هیندستان تا لە هەفتەی ئایندە گەرمەو بوود

شەفەق نیوز/ ئاراس جەبار شارەزای کەشناسی کورد، ئمڕوو پەنجشەممە، وت: ناوچەگە کەفێدە کاریگەری زووریگ خوارین وەرزی هیندستانی، تا لە هەفتەی ئایندە نزیکەی دوو تا چوار پلەی سیلیزی گەرمی بەرزەو بوود.    

جەبار لە پۆستیگ لەبان فەیسبووک نویسان: پلەی گەرمی لە رووژ شەممەو دەسکەێدە بەرزەوبوین، لەوەر کاریگەری لە زوور خوارین وەرزی سویەر لە هیندستان، ودیاری کرد ک پلەی گەرمی لە دوو تا چوار پلەی سیلیزی بەرزەو بوود، و لە رووژ ١٦ – ١٨ ئی مانگ ئابە رەسێدە لویتکە.  

پسپۆڕەگە وتیش: بەرزەوبوین ئاست تەڕی وەگەرد پارچەیل ئەوریگ جیاجیا لە رووژەیل هەفتەی ئایندە دەسوەپی کەێد.  

جەبار وتیش: لەماوەی ١٩ تا ٢٥ لە مانگ ئاب، کاریگەری ئەو زوور وەرزیە کەمەو بوود، و ئەوەسا وە ئاست دوو پلە گەرمیەگە داوەزێد، و دویای ئەوە مەزەنەی بەرزەوبوین پلەی گەرمی ئەرا ئی ئاستە نییە.