عراق یادداشت لەیەکفامستن وەگەرد کۆمپانیایگ تورکی واژوو کەێد ئەرا وەڕێوەبردن زیرەکی ئاو
شەفەق نیوز- بەغداد
وەزارەت سەرچەوەیل ئاوی، ئمڕوو یەکشەممە، راگەیان لە واژووکردن رێککەفتن هاوکارییگ وەگەرد کۆمپانیایگ تورکی وە ئامانج گەشەپیدان وەڕێوەبردن زیرەکی سەرچەوەیل ئاوی و هازدارکردن ئاڵشتکاری دیجیتاڵی.
وەزارەتەگە لە بەیاننامەیگ کە رەسیە ئاژانس شەفەق نیوز وت، کە وەزیر سەرچەوەیل ئاوی، موسەننا تەمیمی، رێککەفتن هاوکارییگ وەگەرد کۆمپانیای "کۆلای سۆفت" تورکی واژوو کرد، کە ئامانج لەلی دانان چوارچیوەیگ هاوبەشە لە بوار وەڕێوەبردن زیرەکانەی سەرچەوەیل ئاوی، وە شیوەیگ کە بەشداری بکەێد لە وەکارهاوردن ئایدیاڵ ئەرا ئاو و گەشەپیدان پرۆژەیل ئاڵشتکاری دیجیتاڵی.
تەمیمی، دۊای واژووکردنی، دووپات گرنگی رێککەفتنەگە کرد لە سای سەختییە کەشوهەواییەیل کە عراق رۊوەڕۊیان بوودەو، و ئەوەگ وەگەردی تیەێد لە بەرزەوبوین لە رێژەیل وەکارهاوردن ئاو، و دیاری کرد کە رێککەفتنەگە هیچ پابەندبۊنیگ یا باریگ دارایی لەبان وەزارەتەگە لەخوەی نیەگرێد.
یادداشت هاوکارییەگە سوودگردن لە ئەزموونەیل کۆمپانیا تورکیەگە لەخوەی گرێد لە گەشەپیدان سیستەمیگ تەواوکەر ئەرا چەودیاریکردن و پەیمانەکردن ئاوەیل سەر زەوی و ژیر زەوی، و گردەوکردن داتایەیل و وەڕێوەبردنیان، وەگەرد ئامادەکردن بەرنامەیل ئەرا چەودیاریکردن و شیەوکردن ئەرا خاڵەیل وەکارهاوردن.
هەرلیوا هاوکارییەگە لەخوەی گرێد لە پشتبەسن وە ئامێرەیل خوەنستن پێوەرەیل لە دۊرەو و تەکنەلۆژیای هەسپیکردن، وەگەرد ئامادەکردن بەرنامەیل مەشقکردن ئەرا کادیرەیل وەزارەتەگە و گەشەپیدان سیستەمەیل ئاڵشتکاری دیجیتاڵی وەپای کارە لەپیشینە نیشتمانییەیل.
رێککەفتنەگە، وەپای بەیاننامەگە، دەق بەسێد لەبان گەشەپیدان سیستەم زانیاریە جوگرافییەیل GIS ئەرا دیاریکردن شوین سەرچەوەیل ئاو و دامەزراوەیل و خاڵەیل وەکارهاوردن، و بەسانن داتایەیلی وە نەخشە دیجیتاڵییەیل، وە شیوەیگ کە توانای وەزارەتەگە هازدار بکەێد لەبان وەدۊاچگن سەرچەوەیل ئاوی و وەڕێوەبردنیان وە پشتبەسین وە داتایەیل و تەکنەلۆژیا نوویەیل.
