سیستانی پەیامیگ لەباوەت مادەی هووشبەر ئەرا دەسەڵاتەیل کلکەێد
سیستانی وەکارهاوردن و بازرگانیکردن هووشبەری حەرام کرد، و وت: ئەو وەرپرسە کە خەمسەردی وەرد دژایەتی هووشبەری کەێد بایەسە دەس لەکار بکیشێد.
لە وەڵامەگەی سیستانی مانیش: هووشبەری وە گشت چینەیلی حەرامە، و ئەو پویلە کە لە ڕییەو تیەێد حەرامە.
سیستانی ری وە وەکارهاوردن بەشیگ لە تریاک هووشبەر دا ئەگەر پزشک پسپۆڕ وەپی تەمەی کرد، و دووپات کرد لەبان گرنگی بڕیان رەفتارکردن وەرد هەر کەسیگ قاچاخی وە هووشبەری کەێد یا بازرگانی وەپی کەێد.
وتیش: جیاوازی لە حەرامی بازرگانیکردن وە هووشبەری و هاوردن و بردنی نییە، دیاری کرد کە هەر کەسیگ لە وەرپرسەیل دژە هووشبەری خەمسەردی لە جیوەجیکردن ئەرکەیلیان کەن ئەوانە تاوانیگ دووقات کەن، و بایەسە دەس لەکار بکیشنەو.
سیستانی وتیش: ئەو لایەنەیل باڵا کە کارەگە وەدەس خوەیانە، وەرپرسیاریەتی گەورەیگ کەفێدە ملیان لە پاکەوکردن دەزگایل ئەمنی و دادوەری لە گەندەڵەیل و گەندەڵکارەیل، و داوا لە بنکە و دامەزراوەیل رووشنهویری و ئایینی کرد و هەرکە لە جی خوەیەو، هووشیاری بکەن، ئەرا دویرەوخستن رخ هووشبەری لەبان مەردم.
سیستانی وتیش: هەرکە هووشبەری بردیە و واز هاوردیە و لە چارەسەری وەردەوامە تا دویاترینی و دی قەت ئەرا هووشبەری گلەو نەخوارد، تەوبەی قەبووڵە.
وتیش: ئەو داڵگە کە ئالوودەی هووشبەری، مافی نیەمینێد کە مناڵ لەلای بوود، ئەگەر زەرەدیگ لەبان مناڵەیل بوی.
