سەرۆک کۆمار شەرمەزار پەلامارەیل سعودیە کەێد: رەت کەیمن خاکەیل عراقی وەکارباریەێد ئەرا دەسدریژی
شەفەق نیوز- بەغداد
نزار ئامێدی، سەرۆک کۆمار عراق، ئمڕوو شەممە، شەرمەزار ئەو پەلامارەیلە کرد کە شانشین عەرەبی سعودی کردنە ئامانج، و دووپات کرد کە عراق قەبووڵ نیەکەێد خاک و ئاسمانەیلی وەکارباێد ئەرا دەسدریژیکردن وەبان وڵاتەیل هاوسا.
ئامێدی لە بەیاننامەیگ، کە رەسیە ئاژانس شەفەق نیوز، وت "پارێزگاری لە سەروەری عراق و هیشتن پەیوەندییەیلی وەگەرد دەورگەرد هەرێمیی وەرپرسیاری دەوڵەت و دامەزراوە دەستوورییەیلە".
دووپات لە پشتگیریی ئەرا ئەو رێکارەیلە کرد کە حکومەتەگە دۊای پەلامارەیل گردەسەیانە وەر، و دووپات کرد لەبان هەوەجەی وەردەوامبۊن لێکۆڵینەوەیل و جیوەجیکردن گشت رێکارەیل یاسایی لە وەرانوەر هەر کەسیگ کە تیکەڵبۊنی یا وەرپرسیارییەتیی چەسپێد، ئەوەگ دووارەنەین دەسدریژییەیل مسۆگەر کەێد.
سەرۆک کۆمار دووپات کرد لە رکداری عراق لەبان پەیوەندییەیلی وەگەرد شانشین عەرەبی سعودی و گشت وڵاتەیل هاوسا، و چەسپانن ئاسایش و سەقامگیری و پارێزگاری لە بەرژەوەنییەیل گەلەیل ناوچەگە، دۊر لە هەر رەفتاریگ کە ئی پەیوەندییەیلە بخەێدە وەر رخ یا زەرەد وە ئاسایش و ئارامی عراق بڕەسنێد.
و ئی هەڵوێستە تیەێد دۊای ئەوەگ سعودیە خەوەردا لە کەفتن کڕ لۊلەیل "خوەرهەڵات–خوەرئاوا" لە هەردوگ ناوچەی ریاز و مەدینەی مونەوەرە ئەرا پەلامارەیلیگ وە فڕۆکەیل بی فڕۆکەوان کە لە عراقەو هاتنە، و بۊنە مدوو زەخمدارییەیل گیانی و زەرەدەیل ماددی.
ریاز وت کە هەڵوژاردیە وەڵام نەیەێدەو لەی قۆناغە، لەبان داوای سەرۆک وەزیرەیل عراقی عەلی فالح زەیدی ئەرا داین دەرفەت وە بەغداد تا رێکارەیل بگرێدە وەر، وەگەرد دووپاتکردن هیشتن ماف پارێزگاری لە سەروەری و ئاسایش و دامەزراوەیل خوەی.
زەیدی فەرمان داگە وە لەکارلاوردن فەرماندەی ئۆپەراسیۆنەیل میسان لە پۆستەگەی و دروسکردن ئەنجومەنیگ لێکۆڵینەوە وەرانەور فەرماندەیی ئۆپەراسیۆنەیل، دۊای چەسپین دەرچگن پەلامارەیل لە یەکیگ لە شوینەیل لەناو پارێزگاگە.
