سودانی روی وەرەو ئەڵمانیا کەێد
بڕیارە نێچیروان بارزانی سەرۆک هەرێم کوردستانیش لە کۆنگرەی میونخ ئەرا ئاسایش بەشداری بکەێد، ک لە ١٧ تا ١٩ی شوبات وەڕیەو بچوود.
وەگورەی ئەو زانیارییە ک کەفتیەسە دەس ئاژانس شەفەق نیوز، نێچیروان بارزانی سەرۆک هەرێم کوردستان ئەوەسا لە کۆنگرەی میونخ ئەرا ئاسایش لە خول پەنجا و نوهەمی بەشداری بکەێد، ک لە ماوەی ١٧ی شوبات تا ١٩س شوبات وەڕیەو بچوود، ئەوەیش وە بەشداریکردن ٤٥ سەرۆک و سەرۆک وەزیرەیل ئەرا باسکردن لە باوەتەیل سیاسی و ئەمنی جەهانی، هەمیش ١٠٠ وەزیر وەرگری و دەرەوە لە جویراجویر وڵاتەیل جەهان بەشداری لە کۆنگرەگە کەن، وەگەرد دەیان سەرکردە و کەسایەتی جەهانی ناودار و پسپۆڕەیل ئاسایش و تیرۆر.
نێچیروان بارزانی سەرۆک هەرێم کوردستان و سەرۆک فەرەنسا و سکرتێر ناتۆ و سەرۆک یەکیەتی ئەورووپا و شاندیگ ئەمریکی گەورەیگ فرەیان هانە کۆنگرش ئەمریکا وەگەرد شاندیگ ئۆکران و بڕیگ لە شاندەیل جەهانی و ریخریایەیل و ناوەندەیل ستراتیژی و سیاسەتمەدار جەهانی بەشداری کەن.
هەرلە ئیران و رووسیا لەو کۆنگرە بەشداری نیەکەن، وەگورەی قسەی کریستۆف هیسوگن سەرۆک کۆنگرەگە ک وت: رووسیا شوینیگ لەناو کۆنگرەگە نەیرێد ک تاوانەیل جەنگ لە ئۆکرانیا لەبانی چەسپیا، وتیش: ئیرانیش ئیجارە لەی کۆنگرە بەشداری نیەکەێد، چوینکە بنەمایل ماف مرۆڤ شکانیە، و لە جیای ئەوان کەسایەتیەیلیگ لە ئۆپۆزسیۆن بەشداری کەن.
