٦ ساڵ زیندانی ئەرا وەڕێۆبەر وەرین دەزگای خانەنشینی
شەفەق نیوز/ سەرچەوەیگ چەودێر، ئمڕوو سێشەممە، ئاشکرای دەرچگن فەرمانیگ وە ٦ ساڵ زیندانی دژوە ئەحمەد عەبدولجەلیل ساعدی وەڕێۆبەر گشتی وەرین دەزگای خانەنشینی نیشتمانی کرد، و ئاماژە کرد ک ساعدی هیمان هالە وەردەم دادوەری لەوەر باوەتەیلیگ تر.
سەرچەوەگە ئەرا ئاژانس شەفەق نیوز وت: دویای تەواوکردن لێکۆڵینەوەگان لە باوەتەگەی ساعدی، لەلایەن دەسەی دژە گەندەڵی و تاوانە کرنگەگان و هەواڵەکردنی ئەرا دادوەری، دادگای تاوانەگان دژوە گەندەڵی ناوەندی، ئمڕوو، فەرمانیگ روی وەڕوی دەرکرد وە ماوەی ٦ ساڵ زیندانی وەگورەی فەرمانەیل بڕیار ١٦٠ ئەرا ساڵ ١٩٨٣.
سەرچەوەگە دیاری کرد ک فەرمانەگە لە باوەت گریەبەسی تەندروسی و بڕین پویلەیلیگ لە خانەنشینەگان وە پێچەوانەی یاسا وە هاوبەشی وەگەرد کۆمپانیای سەلامە ئەرا دەسوەردان بازرگانی دەرچگ، و ئاماژە کرد ک باوەتەیلیگ تر لەبان تاوانبارەگە لە چەوەڕی دادگاکردن هەس.
