زەیدی کووتاییهاتن وە ئەرک هاوپەیمان ناودەوڵەتی راگەیەنێد و دووپات کەێد: هیچ چەکیگ لە دەیشت یاسا نییە
شەفەق نیوز- بەغداد
سەرۆک ئەنجومەن وەزیران، فەرماندەی گشتی هێزە چەکدارەیل عەلی فالح زەیدی، رووژ چوارشەممە، سەرپەرشتی ئاهەنگ فەرمی کرد وە بوونەی رووژ سەروەری، و کووتاییهاتن ئەرکەیل هێزەیل هاوپەیمان ناودەوڵەتی ئەرا دژایەتیکردن داعش لە عراق، وە ئامادەبۊن فەرماندەی هێزەیل هاوپەیمانی، و فەرماندەیل جۊراوجۊر پۆلە سەربازییەیل و پێکهاتە ئەمنییەیل.
فەرماندەی گشتی هێزە چەکدارەیل لە وتاریگ کە وەو بوونە پیشکەشی کرد، کووتاییهاتن فەرمی وە ئەرک هاوپەیمان ناودەوڵەتی ئەرا دژایەتیکردن داعش راگەیان، تا بچەسپنێد کە هاوکاری لە ناوەین هێزە دووسەیل و گەلە دووسەیل سەرکەفتنیگ بەرهەم هاورد لەبان یەکیگ لە تاریکترین لاپەڕەیل تونڕەوی و دڕندەیی لە میژوو.
هەمیش وت: هەڵسان گەلەگەمان لەشان هێزە چەکدارەیلمان، دەسپێکیگ بۊ ئەرا قۆناغیگ کە لەناوی هێزەیلمان سیستەمەیل فەرماندەیی رێکخستنەو، و تۊنستن سامانەیل گردەو بکەن، و تەقەلاگان یەکبخەن، و دەس بیەنە دەسپێشخەرییەگە، هەمیش دەوڵەتەیل دووس دەس دەسمیەتی دریژ کردن ئەرا عراق لەو نواگیریکردن یەکلاییکەرە، و هێزە چەکدارەیلمان رزەیلیان رێکخستنەو و وە سەرکەفتن چەکداریان کردنەو.
وتیش: فەرماندەیی پرۆسە هاوبەشەیل ماوەی ساڵەیل جەنگ دژ وە تیرۆر، نۊنەرایەتی دڵ هەماهەنگی و ئەو عەقڵە کردیاد کە زانیارییەیل گردەو کەێدەو و نەخشەکیشان و فەرماندەیی لەناو نەبەردیگ نیشتمانی گەورا وەدەس گرێد.
وتیش: سوپاس و پیزانین پیشکەش وە گشت دەوڵەتە دووسەیل کەین کە بەشداری لە هاوپەیمان ناودەوڵەتی کردن، و ئەرا فەرماندە و ئەفسەر و مەشقپیکەر و راوێژکارەیلی کە لەشان هێزە ئەمنییەیلمان کار کردن.
دیاری کرد کە کووتاییهاتن وە ئەرک هاوپەیمان ناودەوڵەتی وە مانای کووتاییهاتن نەبەردمان وەرد تیرۆر نییە، بەڵکم ئاڵشتبوین عراقە ئەرا قۆناغیگ کە وەرپرسیارێتی تەواو لەبان ئاسایش و ئارامی خوەی بگرێدە گەردن، و ئاڵشتبوین ئەرکەیل پرۆسە هاوبەشەیل ئەرا نویسینگەی فەرماندەی گشتی هێزە چەکدارەیل شیوازیگ دامەزراوەیی وەرجەسە کەێد ئەرا وەڕێوەبەردن ئی تەقەلا لەژیر دەسەڵات دەوڵەت و سەرکردایەتی باڵای.
وتیش: قۆناغیگ نوو دەس وەپی کردگە کە ناونیشانی سەروەری عراق، و هێز دامەزراوەیلی، و ئامادەباشی هێزەیلی، و یەکگرتگیی بڕیارەی، و هاوبەشییە هاوسەنگەیل وەرد دۆستەیلیەتی، و هاوکاری ئەمنی چۊ رێڕەویگ واز مەنێدەو وەرد دووسەیل لە هاوپەیمان ناودەوڵەتی و کاراتر و خەستر بوود.
دیاری کرد: هاوکارییەگە وەکارهاوردن تەکنەلۆجیا و تەکنیکەیل دیجیتاڵی لە خزمەت ئامانجەیل پاڵپشتیکەر ئەرا ئاسایش و ئارامی وەخوەیەو دۊنێد، و ئەرکەگە وە سەرکەفتن کووتایی هات، و وەرپرسیارێتی پاراستن ئی سەرکەفتنە ئمڕوو لەبان شان گشتمانە.
بەیاننامەگەی کووتایی هاورد وە ئەوەگ "هیچ چەکیگ لە دەیشت چەتر یاسا نییە، و هیچ هێزیگ لە دەیشت دامەزراوەیل دەوڵەت نییە، وەپەی ئەوەگ دەستوور دیاریی کەێد و وەپەی ئەوەگ مەرجەعیەت دانای ئیمە داوای کردگە و ئەوەگ گەلەگەمان خوازێدەی".
