کەرکووک و سەڵاحەدین.. مەرگ نادیار گەنجیگ و کوشیان پیاویگ وەدەس کوڕەگەی و ژنەگەی
شەفەق نیوز- کەرکووک/ سەڵاحەدین
پولیس کەرکووک، ئمڕوو جومعە، لێکۆڵینەوەیگ لە هۊردەکارییەیل مەرگ گەنجیگ واز کرد کە لەناو ناوچەی دۆمیز پەیا کریا، لە وەختیگ سەرچەوەیگ پزیشکی خەوەردا کە وەشکین سەرەتایی نشان کەێد کە مردنەگە لە ئەنجام خوەیکوشتن رۊ داگە.
سەرچەوەیگ لە پزیشکی دادوەری لە خەسەخانەی ئازادی ئەرا ئاژانس شەفەق نیوز وت، کە "گەنجەگە تەمەنی رەسێدە 20 ساڵ، و وەشکین سەرەتایی بۊین نیشانەیلیگ ئاشکرا نیشان دا کە خوەیکوشتن لە شوینەیلیگ دیاریکریاگ لە لەشەگە گونجێد".
لەلای خوەیەو، فەرماندەیی پۆلیس کەرکووک لە بەیاننامەیگ کە رەسیە ئاژانس شەفەق نیوز، وت کە "مەفرەزەیل بنکەی پولیس دۆمیز، و هۆبەی نواگیریکردن تاوان، و بەڵگە تاوانکارییەیل، چگنە شوین رۊداوەگە ئەرا ئەنجامداین وەشکین تەکنیکی و یاسایی، لە وەختیگ ئەفسەرەیل لێکۆڵینەوە دەس کردنە گردەوکردن بەڵگەیل و توومارکردن وتەیل ئەرا زانستن مدووەیل مردنگە و دڵنیابۊن لە نەۊین گومان تاوانکاری".
فەرماندەییەگە دووپات کرد کە دۊای تەواوبۊن رێکارە فەرمییەیل ئەنجامەیل لێکۆڵینەوەگە رابگەیەنێد، و داوا کرد پشت وەو زانیارییەیلە بوەسیەێد کە لە لایەنە پەیوەندیدارەیلەو دەرچن و دویرەوکەفتن لە بڵاوکردن پڕوپاگەندەیل.
لە چوارچیوەیگ جیا، فەرماندەیی پولیس سەڵاحەدین خەوەردا لە دەسگیرکردن دوو توومەتبار وە کوشتن پیاویگ لە قەزای دووزخورماتوو، دۊای چەن سەعاتیگ لە رۊداین تاوانەگە.
فەرماندەییەگە لە بەیاننامەیگ، کە رەسیە ئاژانس شەفەق نیوز، وت کە "تیمیگ کار هاوبەش لە مەفرەزەیل فەرماندەیی پولیس سەڵاحەدین، و وە هەماهەنگی راسەوخۆ وەگەرد فەرماندەیی پولیس کەرکووک، تۊەنست وەدۊاکەفتن توومەتبارەیل بکەێد، کە ئەوانیش کوڕ قوربانییەگە و ژنەگەی بۊن، و لەناو شار کەرکووک دەسگیریان بکەێد".
دیاری کرد کە توومەتبارەیل رەوانەی لایەنە پەیوەندیدارەیل کریان ئەرا تەواوکردن رێکارە یاساییەیل.
