ريکارەیل نواگیری وەپەلە ئەرا سنوردارکردن تەو خوینوەربوین لە کەرکوک
شەفەق نیوز - کەرکوک
تیمەیل ڤێتێرنەری سەر وە خەسەخانەی ڤێتێرنەری فێرکاری لە پارێزگای کەرکووک، ئمڕوو سێشەممە، دەس کردنە وە جیوەجیکردن هەڵمەتیگ فراوان ئەرا رێکارەیل وەرگری و نواگیری، یەیش جویر ئامادەکارییگ ئەرا وەرز بڵاوبوین "تەو خوین وەربوین"، کە هەڵمەتەگە رشانن دەرمان لە کوشتارگایەیل و خان و تەویلەی ئاژەڵەیل لە چەن ناوچەیگ پارێزگاگە گرێدەو.
منسوور ئەحمەد بەیاتی، وەڕێوەبەر گشتی خەسەخانەی ڤێتێرنەری فێرکاری لە کەرکووک، ئەرا ئاژانس شەفەق نیوز وت: "ئی هەڵمەتە لە لایەن تیمەیل ڤێتێرنەری کە لە خەسەخانەگە و بنکەیل ڤێتێرنەری سەر وەپی پێکهاتنە جیوەجی کریا، یەیش لە ناو پلانیگ نواگیرییە کە ئامانجی کەمکردن بڵاوبوین بیماری گشتگیرەیلە، وە تایبەت تەو خوینوەربوین، وەرد بەرزەوبوین پلەی گەرما و زیادبوین مامەڵە وە ئاژەڵ".
بەیاتی وتیش: "تیمەیل ڤێتێرنەری هەڵسیانە وە رشانن دەرمان لە کوشتارگەی مۆدێرن کەرکوک و خانەیل ئاژەڵ، بیجگە رشانن تەویلەی ئاژەڵەیل لە ئاوایی (وەتەنییە) و چەن ئاوایی و قەزا و ناحیەی تریگ کە سەر وە پارێزگاگەن".
ئاشکرایکرد "ئی هەڵمەتەیل نواگیرییە ئامانج لەلی لەناوبردن ئەو مێش و مەگەز و مشەخۆرەیلەسە کە بیماریەگە گواسنەوە، و رەخسانن ژینگەییگ تەندروس ئەرا دابینکردن سەلامەتی گوشت لە بازاڕەیل و پاراستن تەندروستی هاوڵاتییەیل لەو بیماریەیلە کە لە ناوەین ئادەمیزاد و ئاژەڵ هاوبەشن".
دیاریکرد "خەسەخانەی ڤێتێرنەری بەردەوامە لە جیوەجیکردن هەڵمەتەیل دەوری لە ناوچە جیاجیاگەیل پارێزگاگە، وە هەماهەنگی وەرد لایەنە پەیوەندیدارەیل، ئەرا چاودێریکردن بارودۆخ تەندرووسی ئاژەڵەیل و کەمکردن هەر رخداریگ کە ئەگەر بڵاوبوین بیاشتوود".
