رزگارکردن دوو دویەت رفیای وکوشیان گەنجیگ وەچەقو لە باشوور عراق
شەفەق نیوز/ سەرچەوەیگ ئەمنی لە پارێزگای زیقار، ئمڕوو شەممە، خەوەردا لە کوشیان گەنجیگ بیس ساڵان لە باکوور خوەرهەڵات پارێزگاگە، و هیزیگ ئەمنی توەنست دوو دویەت رفیای لە میسان ئازاد بکەێد و بڕفنەیلیان بگرێد ک کوڕیگ و دوو ژن بوینە.
سەرچەوەگە ئەرا ئاژانس شەفەق نیوز وت: گەنجیگ لە ناو تەمەن بیس ساڵان وە چەقو کوشیاگە لە قەزای دەوایە لە پارێزگای زیقار دویای ئەوەگ کەفتیەسە ناو مرافەیگ وەگەرد باوگ وکوڕیگ.
سەرچەوەگە وتیش: تاوانکارەیل وەرەو شوین نادیاریگ واینە، دەزگا ئەمنیەیلە کەفتنەسە مینەیان.
لە میسان، وەڕێوەبەرایەتی پۆلیس پارێزگاگە ئازادکردن دوو دویەت راگەیان و دەسگیرکردن بڕفنەیل دویای سێ رووژ لەیەکیگ لە ناوچەیل شار عمارە.
پۆلیس لە بەیاننامیگ وت: دویای وەرگردن زانیاری لە رفیانیگ، تیمیگ لە بەش دژەتاوان دروس کریا، و رەسینە بڕفنەیل ک شمارەیان ٣ کەس بوی، دووانیان ژن بوین وەگەرد کوڕیگ گەنج، ودەسگیر کریان، و دوو دویەتەگە ئازاد بوین، وەرجەیە تەقەلا بیەن وەرەو دەیشت پارێزگاگە بوەنەیان.
