دیوانیە بکوش خوەنەواریگ کۆلێژ پۆلیسی دەسگیرکەێد و توومارکردن رویداوەیل ئەمنی

شەفەق نیوز/ وەزارەت ناوخوەی عراق، ئمڕوو دووشەممە، خەوەردا لە دەسگیرکردن گشت ئەو کەسەیلە توومەتبار وە کوشیان خۆەنەواریگ کۆلێژ پۆلیسی "ئەمیر خالیدی" لە دیوانیە باشوور وڵاتەگە، لەهەمان وەخت لە کەرکوک زەخمداربوین کەسیگ وە گولە و دەسگیرکردن 4 توومەتبار کە چەک و کەرەستەیل دروسکردن مادەی هووشبەر وەپیان بویە.

وەزارەتەگە لە بەیاناامەیگ رەسیە ئاژانس شەفەق نیوز  راگەیان، "تیمەیل کارکردن هاوبەش فەرماندەیی پۆلیس پارێزگای دیوانیە و وەڕێوەبەرایەتی هەواڵگێری و دژە تیرۆر توەنستن توومەتبارەیل کوشتن خوەنەوار زانکۆی پۆلیسی ئەمیر جابر خالیدی دەسگیربکەن". 

سەرچەوەیگ ئەمنی، رووژ پەنجشەممەی وەرین، 13 شوبات 2025 وە ئاژانس شەفەق نیوز راگەیان، خوەنەواریگ کۆلێژ پۆلیسی تەمەن 19 ساڵان وە گولە گوشیایە، لەدویای ئەوەگ چەکدارەیل لە قەزای شامیە لە دیوانیە پەلاماری دانە.

لە کەرکوک، سەرچەوەیگ ئەمنی وە ئاژانس شەفەق نیوز خەوەردا، "گەنجیگ تەمەن 19 ساڵان رویوەروی دزین ماتۆر بویە لە کویچەی شوراو باکوور کەرکوک وەگەرد دزەیلە بوودە مەرافیان کە سێ کەسبوین لەبان دوو ماتۆڕسکیل لەری دەوانچە تەقە لەلی کردنە لەئەنجام تویش زەخمداری مامناوەندیگ بوی".

وتیش "ئەو سێ کەسە ماتوڕسکیل گەنجەگە دزینە و واینە ئەرا شوین نادیاریگ و زەخمدارەگە ئەرا خەستەخانە کلکریا".

دواە لە کەرکوک، فەرماندەی پۆلیس کەرکوک لیوا یاسایی فەتاح مەحمود خەفاجی لە بەیاننامەیگ رەسیە ئاژانس شەفەق نیوز راگەیان، "وە پشت بەسانن وە زانیاری هەواڵگێریهیل و وەدویاچگن هویرد، هێزەیل ئەمنی چوار تاوانبار لە یەکیگ لە کویچەیل باکوور کەرکوک دەسگیرکردن".

دیاریکرد "هێزەیل ئەمنی دەسگردن وەبان چەک و کەرەستەیلگ کە ئەرا دروسکردن مادەی هووشبەر وەکاریان هاوردنە" وتیش "دسگیرکریاگەیل پێشینەی تاوان دیرن توومەتبارن وە دۆسیەیل دزیکردن و بڵاوکردن مادەی هووشبەر و وە ئامانجگردن ماڵ هاوڵاتیەیل".