دەسگیرکردن و زەخمداری و وەشوینکەفتن ئاخوندیگ لە رویداوەیلیگ جیاجیا لە عراق
شەفەق نیوز/ سەرچەوەیگ ئەمنی لە دیالە، ئمڕوو دووشەممە، خەوەردا لە دەسگیرکردن هەفت توومەتبار وە مرافەیلیگ خیزانی وهووزانە، و هیزە ئەمنیەیلە وەردەوامن لە مینەکردن ئاخونیگ کابرای بزگیریگ رفانیە و کوشتیەسەی، لە وەختیگ چوار مەدەنی وە رویداوەیلیگ جیاجیا لە دیالە و سەڵاحەدین زەخمدار بوینە.
سەرچەوەگە ئەرا ئاژانس شەفەق نیوز وت: هیزیگ ئەمنی هاوبەش هەفت کەس دەسگیر کرد وە توومەت مرافەیگ خیزانی وهووزانە لە ناحیەی بەنی سەعەد، ک ئەو مرافەیلە بوینە هوکار هەیشت قوربانی و زەخمدار لە دوو رویداو جیاجیا.
وتیش: توومەتبارەیل ئەرا لاێەنەیل لێکۆڵینەوە هەواڵە کریان، و هیزەیل ئەمنی خوەیان لەبان ناوچەیل مرافەگە لە ناحیەی بەنی سەعەد چەسپانن.
هەرلیوا، سەرچەوەیگ ئەمنی پایەبەرز ئەرا ئاژانس شەفەق نیوز وت: هیزەیل ئەمنی و هەواڵگری وەردەوامن لە مینەکردن ئاخونیگ وەگەرد کەسیگ هاوبەشی لە رفیان بزگیریگ لە ناوچەی ندا لە دەورگرد مەنەلی، و وەرەو ناوچەی چووڵیگ بردنەسەی و لە سنوور ناوبەین ناحیەی قەزانیە و پاریزگای واست کوشتنەسەی و نانەسەی خاک، دویای ئەوە ک خانەوادەی رازی نەویە ٢٠٠ هەزار دۆلار وەپیان بیەێد.
سەرچەوەگە دیاری کرد ک ئەو ئاخونە و هاوبەشەگەی خەڵک قەزای بەلەدرووز بوینە، و ئی تاوانە ئەرا تەمای خوەیان جیوەجی کردنە.
هەمیش لە دیالە، سەرچەوەیگ ئەمنی ئەرا ئاژانس شەفەق نیوز وت: دوو گەنج وە رویداویگ هاتوچو لەبان ری جدیدە ئەغەوات لە دەورگرد قەزای خاڵس زەخمدار بوین، وتیش زەخمەیلیان سەختە و هانە ژێر چەودیریکردن هویرد لە خەسەخانەی بەعقوبە.
لە رویداویگتر، وەگورەی خود سەرچەوەگە، گەنجیگ لە قەزای خاڵس تویش تەزیان کارەبا هات، وبریا خەسەخانە و ها ژیر چەودیری هویرد.
لە سەڵاحەدین، سەرچەوەیگ ئەمنی ئەرا ئاژانس شەفەق نیوز وت: پیاوێگ وە رویداویگ هاتوچو لە قەزای سامەڕا زەخمدار بوی، و ئەرا خەسخانە بریا.
