دەسگیرکردن دوو دویەت خانەوادەی خوەیان لە تكريت کوشتنە
![دەسگیرکردن دوو دویەت خانەوادەی خوەیان لە تكريت کوشتنە](https://media.shafaq.com/media/arcella/1662640047210.jpg)
شەفەق نیوز/ سەرچەوەیگ لە پۆلیس پارێزگای سەڵاحەدین، ئمڕوو پەنجشەممە، خەوەردا لە دەسگیرکردن دوو دویەت توومەتبار وە کوشتن کەسەیل خانەوادەیان لە دەورگرد شار تكريت وەرجە چەن رووژیگ.
سەرچەوەگە ئەرا ئاژانس شەفەق نیوز وت: هیزیگ ئەمنی وە هەماهەنگی وەرد هەواڵگری هەرێم کوردستان، توەنست دوو دویەت دەسگیر بکەێد، ک تاوانیگ دڵتەزن لە شار تكريت جیوەجی کردنە، ئەوەیش وە کوشتن کەسەیل خانەوادەی خوەیان، ئیجا وەرەو هەرێم کوردستان واینە.
وتیش: دوو دویەتەگە دریانە دەس لایەنەیل لێکوڵینەوە ئەرا جیوەجیکردن ریکارەیل یاسایی.
وەرجە چەن رووژیگ، سەرچەوەیگ ئەمنی خەوەردار ئاژانس شەفەق نیوز کرد ک خانەوادەیگ ک ٤ کەس بوینە لەناو ماڵیان کوشیانە، و ئاشکرای تاوانەگە کریا، هەنای کوڕیان ک لە ئەڵمانیا نیشتەجی بویە پەیوەندی کردیە، و خەوەردار پۆلیس کەردیە، چوینکە پەیوەندیی وەرد خانەوادەی بڕیاگە.
سەرچەوەگە دیاری کرد ک خیزانەگە خەڵک پارێزگای دیالە بوینە، و لە ساڵ ٢٠٠٩ لە تکریت نیشتەجی بوینە، و هووکار تاوانەگە هاژیر لێکۆڵینەوە.