دەسگیرکردن کابرایگ هەڕەشەی بڵاوکردن وینەی خیزان پیاویگ دایە وداوای ١٠٠ هەزار دۆلار لەلی کردیە
شەفەق نیوز/ وەزارەت ناوخۆی عراق، ئمڕوو سێشەممە، دەسگیرکردن چزدەریگ ئەلیکترۆنی راگەیان، ک هەڕەشەی بڵاوکردن وینە وپارچە ڤیدیۆی خیزانیگ دایە، ئەگەر ١٠٠ هەزار دۆلار وەپی نەیەێد.
ئاژانس وەزارەتەگە ئەرا کاروبار پۆلیس لەبەیاننامیگ رەسیە ئاژانس شەفەق نیوز وت: مەفرەزەیل دژە تاوان بەغداد توەنستن توومەتباریگ دەسگیر بکەن، ک چزدان ئەلیکترۆنی کەسیگ دایە و هەڕەشەی وە بڵاوکردن وینە و پارچە ڤیدیۆی خیزانەگەی ئەگەر سەد هەزار دۆلار ئەمریکی وەپی نەیەێد.
ئاژانسەگە وتیش: دویای ئەوە ک پیاوەگە پەنا وە مەفرەزەیل نویسینگەی دژە تاوان مەنسوور دایە ک کەفتیەسە وەر چزدان ئەلیکترۆنی لەلایەن کەسیگ نەناسریاگ، دویای ئەوە ک هاک هەژمار تایبەتی کردیە.
بەیاننامەگە وتیش: ئەرا گرنگی باوەتەگە، تیمیگ دروس کریا، و دویای مینەکردن و گردەوکردن زانیاری، و دویای تەقەلای گەورەیگ، رەسینە توومەتبارەگە، وە کوڵەگردن توکمەیگ دەسگیر کریا.
بەیاننامەگە وتیش: توومەتبارەگە دان وە تاوان خوەی دا ک چز ئەو کەسە دایە و هەڕەشەی بڵاوکردن وینەی خیزانەگەی کردگە، وەرانوەر پویل.
