دۊای قەیەغەکردن فڕۆکەوانی ئیرانی.. فڕۆکەخانەی نەجەف مینەی "کڕەیل جیگر" ئەرا چالاککردن جویلەی کەێد

شەفەق نیوز- نەجەف

پارێزگار نەجەف یوسف کناوی، ئمڕوو یەکشەممە، رێنمایی وەڕێوەبەرایەتی فڕۆکەخانەی پارێزگاگە کرد وە کیشانن کۆمپانیایل فڕۆکەوانی نوو ئەرا زیایکردن جویلەی ئابووری.

 فڕۆکەخانەی ناودەوڵەتی نەجەف لە بەیاننامەیگ کە رەسیە ئاژانس شەفەق نیوز وت، کە رێنمایی پارێزگارەگە، ئەرا کارکردن هات لەبان بڕیار داوەزانن خەرج سزەمەنی وە جۊریگ کە بەشداری بکەێد لە کەمەوکردن خەرجەیل کارکردن، و پاڵپشتیکردن کۆمپانیایل فڕۆکەوانی کارکەر لەناو فڕۆکەخانەگە ئەرا تونەوکردن رێژەی گەشتەیلی لەڕییەو.

و دیاری کرد کە رێنماییەگە هەمیش گرنگی کارکردن لەبان کیشانن کۆمپانیایل فڕۆکەوانی نوو و وازکردن شوینەیل ئاسمانی زیاتر لە و وەرەو فڕۆکەخانەی نەجەف ئەشرەف لەخوەی گرد، وە جۊریگ کە جویلەی گەشتەیل و گەشتیارەیل تونەو کەێد و پاڵپشتی چالاکی گەشتیاری و ئابووری لە پارێزگاگە کەێد.

 لە سەعاتیگ دیر لە شەو پەنجشەممە، وەڕێوەبەرایەتی فڕۆکەخانەی نەجەف ناودەوڵەتی بڕیار دا، وە وسانن گشت گەشتە ئاسمانییەیل کە لە ئیرانەو تیەن و وەرەو ئەورا چن، لە سەعات دوو شەوەکی جمعە 25 ئەیلول/ سێپتەمبەر 2026 دەسوەپیکرد و تا ئاگادارکردنیگ ترەک، وە پشت بەسین وە رێنماییەیل فەرمی لەلایەن لایەنەیل تایبەتمەنەو.

 ئی پەرەسەنینە لەژیر سای سزایەیلیگ تیەێد کە وەزارەت خەزانەی ئەمریکی لە هەشت ئەیلول/ سێپتەمبەر خەوەر لەلیان دا لەبان 36 لایەن بەسیاگ وە کەرت فڕۆکەوانی ئیرانی، کە 27 کۆمپانیای فڕۆکەوانی لەناویانە.