دیالە وە یەک تەکان سێ تویشهاتن وە تەو خوەینوەربوین توومار کەێد
2023-07-10T12:08:44+00:00
شەفەق نیوز/ خەسەخانەی ڤیتێرنەری لە دیالە، توومارکردن ٣ تویشهاتن وە یەک تەکان وە تەو خوەینوەربوین راگەیان، لەوەر تیکڵابوین تویشهاتنەیل وە گووشت قوربانیکردن، و دووپات کرد ک لەی ساڵە ١٠ تویشهاتن وەبیماریەگە توومار کریایە.
ئیبتسام محمد قەیسی خانمە وەڕیەوبەر خەسەخانەگە ئەرا ئاژانس شەفەق نیوز وت: پارێزگاگە ٣ تویشهاتن وە تەو خوینوەربوین توومار کرد، یەکەمەگە لەلای ژنیگ لە تەمەن ٤٠ ساڵە، لە گەڕەک ئەمین دەورگرد بەعقووبە، و دویەمەگە لەلای پیاییگ لە تەمەن ٤٣ ساڵە لە گەڕەک گاتوون، و سیێەمەگە لەلای پیاییگ، لە تەمەن ٣٤ ساڵە لە ناحیەی بوهرز توومار کریا.
دیاری کرد ک ئەو کەسەیلە وە مدوو تیکڵابوینیان وەگەرد گووشتەیل قوربانیکردن، و ئەو بیمارە لە ناحیەی بوهرز ئاژەڵ دیرێد، وتیش؛ بیمارەیل خانە ناو خەسەخانە، و تەندروسییان جیگیرە.
