دیالە ٣١ تووشهاتن نوو و سێ مردن وە ڤایڕۆس کۆڕۆنا تۆمار کەێد
شەفەق نیوز/ سەرچەوەیگ پزشکی لە دیالە خەوەردا ک پارێزگاگە ٣١ تووشهاتگ نوو و سێ مردن وە ڤایڕۆس کۆڕۆنا لەماوەی ٢٤ سه‌عات گوزەیشتە تۆمار کرد.
سەرچەوەگە ئەرا ئاژانس شەفەق نیوز وت: ٨١ نموونە لە تاقێگەیل تەندروسی گشتی لە بەعقوبە تاقیکریا، و ٣١ تووشهاتگ دەرخستن لە قەزا وناحیەگان پارێزگای دیالە.
سەرچەوەگە دیاری کرد؛ یەک حاڵەت لە تووشهاتگەگان ئەرا یەکیگ لە کاردە پزشکیەگان بوی، ویەکیگ ئەرا کادریگ تەندروسی.
سەرچەوەگە بڕ گشتی تووشهاتگەیل ڤایڕۆسەگە لە پارێزگای دیالە گردەو کرد لە ٤ ئادار گوزەیشتە تا ئیسە وە ١٥٣١ تووشهاتگ، لەلیان ٢٤٥ کادر تەندروسیە و ٩٣ پزشک و دەرمانکار.
سەرچەوەگە ئاماژەدا ک ٣ مردن نوو لە پارێزگای دیالە تۆمار کریا، و بڕ گشتی مردگەیل لەوەخت تۆمار کردن یەکەمین مردگ لە ٢٢ ئادار گوزەیشتە تا ئیسە بەرزەوبوی ئەرا ٩٣ مردگ، ك یەک پزشک هاناویان.
سەرچەوەگە ئاشکراکرد ک بڕ خاسەوبویەیل ٣٥ کەسن ، ویەوە بڕ گشتی خاسەوبویەیل لە ١٠ ئادار گوزەیشتە تا ئیسە ٦٩٦ کەسە، ٨٤ پزشک و دەرمانکار وپەرستار.
وهەمیش ئاماژەدا ک ٧٤٢ بیمار هانە ژیر چارەسەری لە هۆڵەیل کەرەنتین.
