دویای چەن باوەتیگ ناشرین.. خانەقین قەیەغەی هاتن رووژنامەوانەیل لە دەیشتی کەێد
شەفەق نیوز/ قایمقامیەت خانەقین، ئمڕوو دووشەممە، بڕیاریگ وە قەیەغەکردن هاتن رووژنامەوانەیل لە دەیشت شارەگە وەبی مووڵەت فەرمی دەرکرد، لە وەختیگ چینەیلیگ راگەیانن وناوەندەیل مافی ئەرا وەرگریکردن لە رووژنامەوانەیل پیشوازی لە بڕیارەگە کردن، وجویر مقەیەتیکردن رسووم وتەقالید لە سووکایەتی دانەی قەڵەم.
وەگورەی بەڵگەنامەیگ لەلایەن قائیمقامیەت خانەقین ک چاپیگی کەفتە دەس ئاژانس شەفەق نیوز، بڕیار قەیەغەی هاتن هەر رووژنامەوانییگ یا تیمیگ راگەیانن لە دەیشت خانەقین وەبی وەرگردن مووڵەت فەرمی دریا.
چینەیل راگەیانن لە خانەقین پیشوازی لە بڕیارەگە کردن، و جویر مقەیەتیکردن لە ئامانجکردن و سووکایەتی وە چنین کۆمەڵایەتیی دانەی قەڵەم، و نواگرد بڵاوکردن باوەتەیلیگ ناشرین.
چالاکوان و پسپۆرەیلیگ ئەرا ئاژانس شەفەق نیوز وتن: هووکار بڕیارەگە چوودەو ئەرا ئەنجامدان توومارکردن راپۆرتەیلیگ سووکایەتی وە تەقالید و رسوومەیل خانەقین کەن، و کەسەیلیگ وەکار تیەرن ک گیچەڵ دروینی و مەغزی دیرن و پەسەنیان کەن تا ئەجیندایگ جیوەجی بکەن ئەرا دروسکردن ئاژاوە و بەدرەفتار کۆمەڵایەتی.
ئەمیر خانەقینی نوێنەر ناوەند میترۆ ئەرا وەرگریکردن لە ماف رووژنامەوانیەیل لە خانەقین ئەرا ئاژانس شەفەق نیوز وت: بڕیار ئیدارەی خانەقین خاسە و ئەرا مقەیەتیکردن خانەقین لە هەڵمەتەیل ئامانجکردن و سووکایەتی تیەێد وە راپۆرتەیلیگ راگەیانن و خەوەری دویر لە راسی پاریزکار وپابەند لە خانەقین و ئەو یەکگردن کۆمەڵایەتی قایمە ک دیرێدەی.
خانەقینی وتیش: بەشیگ لە راگەیانکارەیل و ئەوانەگ ئی نازاناوە بڕنە باڵای خوەیان ناونشانەیلیگ رووژنامەوانی بەد وەکار تیارن ئەرا سووکایەتی ورسواکردن کۆمەڵگای خانەقین ک جویر نموونەیگە ئەرا رسووم وتەقالید و مافەیل مرۆیی.
خانەقینی دیاری کرد ک بڕیارەگە راگەیانکارەیل ناو خانەقین وەخشێد لەوانەگ هانە سەندیکای رووژنامەوانی و وە فەرمی ناسیانە، و ئەرا نواگردن ئەوانە هات ک لە مەیدان خانەقینی راو کەن، و ئەوانەگ وەزوور خوەیان چەسپاننەسە رووژنامەوانی، و دووپات کرد ک کۆمەڵگای خانەقینی ڕازی نییە سووکایەتی لە رەسەنی و دێرینی میژووی لە هەر لاییگ بکریەێد.
لەلای خوەییش، ئەمەل باجڵان خانمە سکرتێر سەندیکای رۆژنامەنووسەیل لە هەرێم کوردستان- لق خانەقین، باس پشتگیریی لە بڕیار ئیدارەی خانەقین کرد، وە قەیەغەکردن هەر رووژنامەوانییگ یا کەسیگ خوەی کەێدە راگەیانکار باێدە ناو خانەقین وەبی مووڵەت فەرمی، ئەرا مقیەتیکردن یەکگردن رسووم وتەقالید خانەقین.
ئەمەل خان لە قسەیلی ئەرا ئاژانس شەفەق نیوز وت بڕیار ئیدارەی خانەقین مقەیەتیکردنە ئەرا ناو قەزاگە و ئەوەگ لە چین وەیەکەوژیان کۆمەڵایەتی و رەتکردن نەتەوەگەرایەتی وەشیوەیگ یەکلایی وەدەس هاورد، و داوای ریکارەیل نواگریگ لەبان لایەنەیلیگ کرد ک سووکایەتی وە راگەیانن و کۆمەڵگای خانەقین وە شیوەیگ تایبەت کەن.
باجڵان وتیش: خانەقین هەر بویە وهیمان مەنیە جویر شاریگ ئەرا ئەدیبەیل وسەرکردەیل و روشنهویریەیل، و هەمیشە دویرە لە سەنگەرەیل نەتەوەگەری ومەزهەوی.
