دویای یەک رووژ لە مینەکردن.. پەیاکردن تەرم گەنجیگ لەناو ئاو شەتلعەرەب

شەفەق نیوز/ تیهم مەلەوانی پولیس پارێزگای بەسرە، ئمڕوو جمعە، توەنست تەرم گەنجیگ پەیا بکەن کە خوەی کوشتیە، دویای یەک رووژ لە مینەکردن وەردەوامیگ.

 پەیامنێر ئاژانس شەفەق نیوز وت: تەرمەگە شەوەکی ئمڕوو جمعە پەیا کریا، دویای رووژیگ لە مینەکردن وەردەوامیگ.

 پەیامنێرمان وتیش: ئەو گەنجە کە خوەیکوشتیە لەداڵگبوی 2001 خوەی لەبان پیەڵ خالد لە ناوچەی تەنوومە لە بەسرە خوەی خستە خوارەو.

جی باسە کە سەرچەوەیگ ئەمنی لە پارێزگای بەسرە، ئیوارەی دویەکە پەنجشەممە، خەوەردار ئاژانس شەفەق نیوز کرد کە گەنجیگ خوەی لەبان پیەڵ خالد خستە ناو ئاو شەتلعەرەب لە ناوچەی تەنوومە.