داعش لەناوبەین کوردستان و سەڵاحەدین گورجەو بوود
شەفەق نیوز/ وەرپرسەیلیگ لە هەرێم کوردستان، و پارێزگای سەڵاحەدین، ئمڕوو شەممە، هوشداری لە گلەوخواردن کارەیل رفیان و هەڕەشەی مەدەنیەیل لەناوچەیل ناوبەین سەڵاحەدین و قەزای کفری دان، لەوەر ئەو بۆشاییەیل ئەمنی چووڵە لەناوبەین هێزەیل فیدراڵی و پێشمەرگە.
حەسەن زەینولعابدین قایمقام قەزای خورماتوو ئەرا ئاژانس شەفەق نیوز وت: داعش لە هەفتەی گوزەشتە تەقەلا دا شوانیگ لە نزیک سنوور کفری خورماتوو لەنزیک سنوور قەزای کەلار بڕفنێد، وشکست هاورد.
زەینولعابدین وتیش: بۆشایەیلیگ ئەمنی فراوانیگ هالە ناوچەیل حەویجە و حەمرین تا رەسێدە دەورگرد دیالە، هیمان شۊن و لانەی داعشە و لەورا چالاکیەیل تیرۆرییان دەسوەپی کەێد، ک خوازێد زۊ دەسوە ئۆپراسیۆن هاوبەش ناوبەین پێشمەرگە و هیزەیل فیدڕاڵی بکریەێد، ئەرا بەسانن ئەو بۆشاییەیلە، و نواگردن داعش لە گلەوخواردن ئەرا رفیان و هەڕەشەی مەدەنیەیل لە ئاوایە سەختەیلەی دەورگرد خورماتوو.
قایمقام خورماتوو وتیش: ناوچەیل خورماتوو و ئاوایەیلی لەناو سنوورەگە وەتەواوی ئارامە و هۊچ کاریگ رفیان یا پەلاماریگ تیرۆری وە درۊژی سێ ساڵ گوزەشتە نەیە.
لەلای خوەییش، شەماڵ نامیق کەرەم قایمقام قەزای کفری سەروە ناوچەی گەرمیان لە هەرێم کوردستان، دووپات کرد ک هۊچ رفیانیگ لەناو سنوور کفری نەۊە، و ئەو کارەیلە لەناو سنوور خورماتوو بۊە.
نامیق کەرەم ئەرا ئاژانس شەفەق نیوز دووپات کرد ک هیزەیل پێشمەرگە وە ئەو هێزەیل لە گەرمیان کۆتایی وە چالاکی ریخریاگ داعش لە کفری و دەوگردی هاوردن، وەگەرد وەردەوامی لە وەشکین ئەرا ناوچە سەختەیلە.
