دادگای عراق: 167 داد لەبان بازرگانی کردن وە مرۆڤ و 16 خوەیکوشتن لە تەموز گوزەشتە
شەفەق نیوز ـ بەغدا
ئەنجومەن دادوەری باڵا لە عراق، ئمڕوو سێشەممە، ئامار تاوانەیل بازرگانی کردن وە مرۆڤ و سەرپیچیکردن یاسای نیشتەجیبوین بیگانەیل، وەرد حالەتەیل تر خوەیکوشتن توومارکریاگ لە دادگایەیل جیاواز لە ماوەی مانگ تەموز/يوليو گوزەشتە لە ساڵ 2026 ئاشکرا کرد.
وەپای بەیاننامەیگ رەسیە ئاژانس شەفەق نیوز، سەرۆکایەتییەیل دادگای وەپیاچگن 167 داد تایبەت وە تاوانەیل بازرگانی کردن وە مرۆڤ توومار کردن، و لە نوای گشتی سەرۆکایەتی داد وەپیاچگن بەسرە هات وە 73 داد، و لە دویای ئەو سەرۆکایەتی داد وەپیاچگن بەغدا/کەرخ وە 21 داد، و لەدویای سەرۆکایەتی دادگای وەپیاچگن بەغدا/رەسافە وە 19 داد.
لە وەرانوەر، دادگایەیل وەپیاچگن نینەوا، نەجەف، زیقار، موسەنا و کەربەلا چووڵ بوین لە توومارکردن هویچ داواکارییگ لەو جویرە لە ماوەی هەمان مانگ.
لەباوەت سەرپیچیکردن یاسای نیشتەجیبوین بیگانەیل شمارە (76) لە ساڵ 2017، دادگایەیل 384 داواکاری توومار کردن، و سەرۆکایەتی داد وەپیاچگن بەغدا/رەسافە هات لە پلەی یەکەم وە 233 داد، و لە دویای ئەو سەرۆکایەتی داد وەپیاچگن بەغدا/کرخ وە 88 داواکاری، و دویایش سەرۆکایەتی دادگای وەپیاچگن واسط وە 28 داواکاری.
دادگایەیل وەپیاچگن لە بەسرە، نینەوا، بابڵ، زیقار، ئەنبار، مەیسان، موسەنا و کەربەلا هویچ داواکارییگ پەیوەنیدار وە سەرپیچیکردن یاسایەیل نیشتەجیبوین لە تموز/يوليو توومار نەکردن.
لەباوەت وە حاڵەتەیل خوەیکوشتن، ئامارەگە دەرخست 16 حاڵەت توومار کریاگە، و سەرۆکایەتی داد وەپیاچگن نینەوا لە پێشەنگی بوی وە 5 حاڵەت، و لە دوای ئەو سەرۆکایەتی داد وەپیاچگن کەرکووک وە 3 حاڵەت، لە وەختیگ سەرۆکایەتییەکانی داد وەپیاچگن بەغدا/رەسافە، دیالە و قادسیە دوو حاڵەت ئەرا گلەیان توومار کردن، و حاڵەتەیلیگ لە هەر یەک لە کرخ و واسط.
