خانەنشینی عراقی دەسکردن وە خەرجکردن مووچەی خانەنشینە مەدەنی و سەربازییەیل ئەرا مانگ ئەیلول راگەیەنێد

شەفەق نیوز- بەغداد

دەسەی خانەنشینی نیشتمانی لە عراق، رووژ سێشەممە، خەوەردا لە دەسکردن وە خەرجکردن مووچەی خانەنشینە مەدەنی و سەربازییەیل ئەرا مانگ ئەیلول 2026 وە شیوەیگ پلە وە پلە.

دەسەگە، لە بەیاننامەیگ، کە رەسیە ئاژانس شەفەق نیوز، داوا لە گشت ئەو خانەنشینەیلە کرد کە نامەی دەقی رەسێدە پیان ئەرا سەردانکردن لقەیل بانکەیل و دەروازەیل پۊلداین ئەلیکترۆنی لە بەغداد و پارێزگایەیل تا مووچەیلیان وەربگرن.

لە وەختیگ زۊتر، سەرچەوەیگ ئاگادار، خەوەردا کە پۊلدارکردن مووچەی خانەنشینە مەدەنی و سەربازییەیل ئەرا مانگ ئەیلول تا نیمەڕو ئمڕوو سێشەممە لە وەزارەت دارایی عراقییەو نەڕەسیەسە بانکەیل، هەمیش سەرچەوەگە ئەگەر دواخستن خەرجکردنی ئەرا سوو چوارشەممە یا دۊای سوو دا.

بەشیگ لە وەزارەتەیل تا ئیسە وە شیوەیگ کووتایی مووچەی فەرمانبەرەیلیان ئەرا مانگ ئاب وەرنەگردنە، کە وەپای سەرچەوەگە، پرۆسەی خەرجکردن مووچەیل وە شیوەیگ پلە وە پلە وەڕیەو چوود وەپای تەواوکردن رێکارەیل پۊلدارکردن و هەواڵەکردن ئەرا بانکەیل.

ئەوەیش هاوەخت وەگەرد چگن عراق ئەرا ناو مانگ ئەیلول تیەێد، لە وەختیگ کە خانەنشینەیل چەوڕی خەرجکردن مووچە نوێیەیلیان کەن، لە وەختیگ پرۆسەی خەرجکردن مووچەی فەرمانبەرەیل ئەرا مانگ ئاب وە شیوەیگ پلە وە پلە وەپای تەواوکردن رێکارەیل پۊلدارکردن وەردەوامە.