تەندروسی هوشداری لە هاتن ئۆمیكرۆن ئەرا ناو عراق دەێد
شەفەق نیوز/ وەزارەت تەندروسی و ژینگەی عراق، ئمڕوو یەکشەممە، هوشداری لە رخ هاتن و بڵاوبۊین ئاڵشتبۊی نوو كوفيد-19 دا، وتیش: ئەوە عراق خەێدە ناو پەتایگ سەختتر لە جارانی.
وەزارەتەگە لە بەیاننامەیگ رەسیە ئاژانس شەفەق نیوز وت: پسپۆڕەیلە لە وەزارەت تەندروسی چەودیری گەشە زۊیەیل هەڵوێست پەتای جەهانی کەێد، وەتایبەت لە دەوڵەتەیل ئەوروپا و بەشیگ لە دەوڵەتەیل هاوسا، ک ئی ئاڵشتبۊی نووە وەزۊیتر بڵاو بوود، ک هیشت ئەو دەوڵەتەیلە ریکارەیل تەندروسی بووەن، و بەشیگیان کەرەنتین گشتی کردن.
وتیش: وەزارەت تەندروسی هوشداری لە رخ هاتن و بڵاوبۊین ئاڵشتبۊیە نووەگە ئەرا ناو وڵاتمان کەێد، ک شایەت کاریگەری لەبان رەوش پەتای ئیسە بکەێد، و تەقەلایل وەردەوام ئەرا کۆنترۆڵکردن پەتاگە بشێونێد، و عراق بخەێدە پەتایگ لە وەرین سەختتر.
وەزارەتەگە وتیش: ڕاپۆرتە زانستیەیلە دووپات لە گرنگی واکسین کۆڤید-١٩ کردن ئەرا کەمکردن چگن ئەرا خەسەخانەیلە و مردنەیلییش وە شیوەی گەورەیگ، و تا ئیسە نەچەسپیاگە ک ئۆمیكرۆن وەرگیری واکسینە توکمەیلە کەێد.
وەزارەتەگە هان گشتی ئەرا تەقەلایل نواگردن ئی شەپۆلە دا، لەڕی زیایکردن واکسین بەرەیلە ک بوودە هووکاریگ ئەر کەمکردن سەختی تۊشهاتنەیلە و کەمکردن چگن ئەرا خەسەخانە و هەمیش مردنەیلە. و داوا لەوانە کرد ک خشتەی واکسین تەواو نەکردنە رۊی وەرەو بنکەیل واکسینەگە لە گشت پارێزگایل بکەن تا واکسین دژوە کۆڤید-١٩ بگرن، ک بڕەیل فرەیگ لەلیان هەس.
وەزارەتەگە داوا لە گشت میدیایل راگەیانن و دامەزراوەیل ئاینی و ریخریایل کۆمەڵگای شارستانی کرد هەڵمەتەیلیان زیایەو بکەن ئەرا هاندان خەڵکەگە.
وەزارەت تەندروسی دووپات کرد ک جیرێف گشت تەقەلای ئەرا کۆنترۆڵکردن پەتاگە دەێد، لە دابینکردن واکسینەیلە و خوازینەیل دیاریکردن و فراوانکردن شۊن شەوخەفی ئەرا وەرگردن شمارەی بیمارەیل، و مقەیەتیکردن دەسکەفتە گرنگەگە لە خاسەوبۊین رەوش پەتاگە و کەمەوبۊن وەردەوام داوەزین وەرچەویگ لە شمارەی بیماریەیلە و مردنەیلە وە ماوەی هەفتەیل گوزەشتە.
