تویڕەبوین فراوانیگ لە عراق.. بڕانن بڕ فرەیگ مووچەی فەرمانبەر و خانەنشینەیل
2026-02-07T10:04:06+00:00
شەفەق نیوز ـ بەغدا
شمارەیگ فرە لە فەرمانبەرەیل و خانەنشینەیل، دویای وەرگردن مووچەی ئێ مانگە، وەمدوو بڕین بڕە پویل لەلیان تویش شۆک هاتن یەیش شەپوولیگ ناڕەزایی و نیگەرانی لای مووچە خوەرەیل وەجیهیشت.
خانەنشین و فەرمانبەرەیل لە ری ئاژانس شەفەق نیوز داوا لە ئەنجومەن نوێنەرەیل و لایەنەیل چەودێری کەن "لێکۆڵینەوە دەسوەجی لە باوتەگە وازبکەن، و وەرپرسەیل دەسەی خانەنشینی و وەڕێوەبەرەیل بانکە حکومییەیل، وەتایبەت هەردوو بانک (رافیدەین و رەشید) بانگهێشت بکەن، ئەرا رووشنکردن هووکار ئەو بڕینەیلە و دۆسیەیل هاوشیوە ترەک، وە مەبەست ماف سوودمەنەیل".
