تورکیا: هیزەیلەمان لە عراق مینن تا قایمکردن سنوورەیل
شەفەق نیوز - ئەنقەرە
یەشار گولەر وەزیر وەرگری تورکی، رووژ سێشەممە، دووپات کرد کە وڵاتەگەی وەردەوام بوود لە هیشتن هیزە سەربازییەیلی لە عراق و سووریا، تا وەخت مسۆگەرکردن ئاسایش سنوورەیل وەرد هەردوگ وڵاتەگە وە شیوەیگ تەواو.
گولەر، لە دیداریگ وەرد ئاژانس رۆژنامەوانی فەرەنسی "ئەی.ئێف.پی" وە وەڵامداین پرسیارەیل نۊسیاگ، وت کە "تورکیا پارێزگاری لە بۊین سەربازی خوەی لە عراق و سووریا کەێد، و وەختیگ هەڵسەنگانن کەیمن کە رەوشە هەوەجەدارەیل وەدی هاتنە لە روی ئاسایش هەرێمی و ئاسایش سنوورەیلەو، ئەوە وەدویاچگن لە رەوش ناوچەیل بنکەیلەمان و بۊینمان لە ناوچەگە کریەێد".
وەرجە کەمتر لە مانگیگ، هاکان فیدان وەزیر دەیشت تورکی کەمەوکردن پلە وە پلەی وڵاتەگەی ئەرا بۊین سەربازی لە عراق بەسادەو وە جیوەجیکردن پلانەگەی لەلایەن بەغدادەو ئەرا چەککردن گرووپە چەکدارەیل، و لە نوایانیانیش پارت کراکارەیل کوردستان و ئەو گرووپەیلە کە پەیوەندیدارن وەپی لە شنگال.
فیدان وت، کە ئەنقەرە گامەیلیگ لەی رویکردنە گرێدە وەر دۊای کۆتاییهاوردن بۊین گرووپە چەکدارەگە لە ناوچەگە، و یەیش لەناو کۆنگرەیگ رۆژنامەوانی بۊ کە لە ماڵ تورکی لە شار نیۆیۆرک بەسیەی.
