بەنزین خوارد و خوەی سزان.. خوەنەواریگ عراقی لەوەر تاقیکردنەوەیل خوەی کوشێد

سەرچەوەگە ئەرا ئاژانس شەفەق نیوز وت: خوەنەواریگ لە پۆل سێیەی ناوەندی یەک بوتڵ بەنزین خوارد، ئیجا ئاگر خوەی دا، ئەوەیش لەوەر فشار دەروینی مەوقەی تاقیکردنەوەیل کۆتایی لەی قۆناغە.

سەرچەوەگە وتیش؛ گەنجەگە لەوەر سزیان قویلی لەناو خەسەخانە گیانی لەدەسدا، و دەسەڵاتەیل ئەمنی لێکۆڵینەوە لە رویداوەگە واز کردن.

چەن پارێزگایگ عراقی، بەرزەبوین وەرچەویگ لە رویداوەیل خوەیکوشتن وە خوەیان دوینن، لەوەر گرفتەیل دەروینی و ژیانگوزەرانی یا لەوەر کاریگەریەیل ماڵپەڕەیلیگ سۆشیال میدیا، کە ئەرا تونەڕەوی گاڵ دەن.