بینتاگۆن: میلیشیاگان لە عراق سەرچەوەی نیگەرانین و ماف وەرگری دیریمن
شەفەق نیوز/ جۆن کیریی قسەکەر وەناو بینتاگۆن وت: وڵاتەکەی ئاگا لەو هەڕەشە دیرێد ک میلیشایل عراقی سەروە ئیران لەبان بەرژەوەنیەیل ئەمریکا لە ناوچەی خوەرهەڵات ناوڕاس دروسی کەن.
وتیش؛ هێزەگانیان وە داوای حکومەت عراق ئەرا دەسمیەتی هێزە عراقیەگان لە وەشوونکەفتن داعش هانه عراق، وەلی میلیشیاگان بوینەسە سەرچەوەی نیگەرانی، لەوەر پەلامارەگانیان لەبان هێز وبینا ژیرینە ئەمریکیەگان، و هێزەگانمان ماف وەرگریکردن لە خوەیان وەرانەوەر هەر پەلاماریگ دیرن.
کیری باس لە خاسەوبوین توانای هێزە عراقیەگان کرد لە سەرەتای جەنگەکە دژوە داعش لە ساڵ ٢٠١٤، و هەمیش دووپات کرد ک نواگردن داعش خوەی تەقەلایگ هاوبەشە.
و دیاری کرد ک دووارە بڵاوکردن هێزە ئەمریکیەکان لە عراق وە راوێژکاری وەگەرد فەرماندە سەربازیەگان و هەرێمیەگان کریەێد، و هەڵبەت وەگەرد دەوڵەتە میوانکەرەگە ک خوەی عراقە.
و هەمیش قسەکەر وەناو بینتاگۆن دووپات کرد ک هەسی هێزە ئەمریکیەگان لە سوریا ئەوەسا تا هەڕەشە لە لایەن داعش هەس، وەردەوام بوود.
هەمیش وت؛ هەسیمان لە سوریا بویچگە، و جەخت کەێدە بان وەشوونکەفتن داعش وە هاوکاری قەسەدە، و هەڕەشەی داعش لەماوەی ساڵەیل گوزەیشتە فرە کەمەو بوین، بەڵکم هیمان هەسەی، وتا ئەوەنە پێویستی وە رویوەڕوبینی هەس، ئەوەسا وەردەوام بویمن.
