بەغدا و هەولێر تەمەی دروسکردن دەسەیگ هاوبەش کەن لەباوەت کەمپەیل ئاوارەیی لە کوردستان
شەفەق نیوز/ قاسم ئەعرەجی سڵاکار ئاسایش نەتەوەیی، ئمڕوو شەممە، گردەوبوینیگ هاوبەش لە هەولێر ئەنجام دا، ئەرا باسکردن لە رەوش کەمپەیل ئاوارەیی لە هەرێم کوردستان.
نویسنگەی راگەیانن لە بەیاننامەیگ رەسیە ئاژانس شەفەق نیوز وت: ئەعرەجی وەگەرد شاند ئەمنی پایەبەر یاوەری، گردەوبوینیگ هاوبەش وەرد وەزیر ناوخۆی هەرێم کوردستان رێبەر ئەحمەد لە هەولێر ئەنجام دا، وە ئامادەبوین هەماهەنگکار نەتەوەیی ئەرا کاروبار مرۆیی لە عراق، و وەرپرسەیل دەزگایەیل ئەمنی لە هەرێم کوردستان، و سەرۆکەیل دادگایەیل هەولێر و نەینەوا و کەرکوک.
بەیاننامەگە وتیش: لە دیدارەگە باس رەوش کەمپەیل (حەسەن شام و دیبەگە) کریا و میکانیزم هەماهەنگی ئەرا یەکلاییکردن پرسیان، وتیش: گردەوبوینەگە رەسیە دەرکردن تەمەییگ وە دروسکردن دەسەیگ هاوبەش و خستن هەڵوێست و تەمەیل وە وەردەس ئەنجومەن دادوەری باڵا لە بەغداد.
