بەسیان فڕۆکەخانەی بەغداد و نەجەف لەوەر خوەڵوتوز فرەیگ
شەفەق نیوز/ فرەی ناوچەیل عراق، ئمڕوو چوارشەممە، کەفتنە وەر گەردەلویلیگ خوەڵوتوز، ک یە سێیەمە وەماوەی کەمتر لە دوو هەفتە، هیشت فڕۆکەخانەیل ناودەوڵەتی بەغداد و نەجەف بوەسیەن.
ئەوریگ لە تووز زەرد فرەی ناوچەیل عراق پووشێد، ک بەغداد پایتەختیش گردەو، و مەزەنە هەس تا رووژ پەنجشەممە وەردەوام بوود، وەگورەی فەرمانگەی رەوانگەی کەشوهەوا لەی وڵات نیمچە بیاوانیە.
لەوەر بەدی کەشوهەواگە و رەسین ئاست نووڕستن ئەرا کەمتر لە ٥٠٠ مەتر، کاروانەیل فڕۆکەخانەی بەغداد وسیا، وەگورەی بەیاننامەیگ فەرمی لە فڕۆکەخانەگە ک وتیش ئەوەسا مەوقەی خاسەوبوین کەشوهەوا جویلەی فڕۆکەیل هاتن وچگن گلەو خوەێد.
هەمیش کاروانەیل ئاسمانی فڕۆکەخانەی ناودەوڵەتی نەجەف وسیا، وەگورەی سەرچەوەی فەرمی.
عامر جابری وەڕیەوبەر راگەیانن رەوانگەی کەشوهەوای عراق وت: خوەڵوتوزەگە کاریگەری لە گشت عراق دیرێد، تایبەت لە ناوڕاس و باشوور وڵاتەگە.
جابری هوشداری ئەوە دا ک عراق کەفێدە وەر ئاڵشبوین کەشوهەوا و زیان لە کەم وارانی و بیاوانی و نەمان تەیمانەی سەوز وەخوەی دۊنێد، ک گشت ئەوانە هیلن خوەڵوتوز بوود.
