بەرزەبوین نرخ دۆلار وەگەرد بەسیان بۆرسەی بەغداد و هەولێر
2023-08-28T13:38:28+00:00
شەفەق نیوز/ نرخ دۆلار ئەمریکی وەرانەوەر دینار عراقی، ئمڕوو دوشەممە، وەگەرد بەسیان بۆرسەی سەرەکی بەغداد پایتەخت، و لە هەولێر پایتەخت هەرێم کوردستان، بەرزەو بوی.
پەیامنێر ئاژانس شەفەق نیوز وت: بۆرسەی سەرەکی کیفاح و حارسیە لە بەغداد پایتەخت، ئیوارەی ئمڕوو، لەبان نرخ ١٥٣٨٠٠ دینار عراقی وەرانوەر ١٠٠ دۆلار ئەمریکی دەرەیلیان بەسان.
شەوەکی ئمڕوو، نرخ ١٠٠ دۆلار ئەمریکی رەسیە ١٥٣٣٠٠ دینار عراقی.
پەیامنێر ئاژانسمان وتیش؛ نرخ فرووشتن و سەنین لە دوکانەیل ناوخوەیی بەغداد بەرزەو بوی، کە نرخ فرووشتن ١٠٠ دۆلار ئەمریکی رەسیە ١٥٤٧٥٠ دینار عراقی، و نرخ سەنینی رەسیە ١٥٢٧٥٠ دینار عراقی.
لە هەولێر پایتەخت هەرێم کوردستان، نرخ دۆلار هەمیش وەگەرد بەسیان بۆرسە بەرزەو بوی، کە نرخ فرووشتن ١٠٠ دۆلار ئەمریکی رەسیە ١٥٤٢٥٠ دینار عراقی، و نرخ سەنینی رەسیە ١٥٤١٥٠ دینار عراقی.
