بەڕیتانیا گەشبینە: گرفتەگان لەناوبەین هەولێر و بەغداد چارەسەر کریەن
شەفەق نیوز/ جیمس کلیڤری وەزیر بەریتانیا ئەرا باوەتەیل خوەرهەڵات ناوڕاس و باشوور ئەفر، ئمڕوو سێشەممە، هان حکومەت هەرێم کوردستان وحکومەت فیدڕاڵی دا ئەرا چارەسەرکەردن ناکۆکی و گرفتە گیرهاتگەهان ناوبەینیان وەتایبەت ئەوەگ وە باوەت مووچەگان و بوودجەی دارایی گشتی پەیوەندی دیرن.
کلیڤری ئمڕوو لە کۆنگرەیگ رۆژنامەوانی لە هەولێر و ئاژانس شەفەق نیوز ئامادەی بوی وت: حکومەت بەریتانی برادەر کۆنەی گەل کوردە، وهەمیش برادەر کۆنەی حکومەت عراقە، و پشتگیری گەورایەگە ئەرا هەرێم کوردستان و لە خود وەختەگە پشتگیری لە حکومەت عراق کەیمن، و زیاندارە ک بنووڕیمن ناکۆکی لەناوبەینیان هەس، بەڵکم ئی گرفتەیلە چارەسەر کریەن، و قسە وەگەرد هەردوگ لاگە کردیمن، و ئومێد خوازیمن وەی نزیکە بڕەسنە ئەنجامەیل خاسیگ.
وتیش؛ فرە خوەشخاڵم ک پەیوەندیەگان ناوبەین هەرێم و بریتانیا فرە خاسن، و ئیمە برادەر کۆن گەل کوردیمن، و زانیاری فرەیگ لە گەل کورد دیریمن، و خوەیان توێنستن داعش لەناو بووەن، و ئەیە هیلێدەمان لە نزیکەو وەگەرد حکومەت هەرێم کار بکەێمن، و هەمیش وەرەو گەشەپێدان پەیوەندیەگان لە چینەیل ئابووری و بازرگانی و هەمیش لە گەشتیاری وە گەرد هەرێم کوردستان.
وەزیرەگە هەمیش وت: ژمارەی کۆمپانیاگان نێزانم ک لە هەرێم کار کەن، بەڵکم مەزەنە کەم ک چینەیل فرەیگ هەس ئەرا کۆمپانیایل بەریتانی تا لە هەرێم کاربکەن.
