باڵ و لایەنەیلیگ ئامادەکاری ئەرا قەیرانەیل نوویگ کەن دویای هاتنەوەی کازمی لە واشینتون

شەفەق نیوز/ هاوپەیمان نەسر، وەوەرپرسایەتی حەیدەر عبادی سەرۆک وەزیران وەرین، ئمڕوو شەممە، هووشداری دا لە قەیرانەیل سیاسی وئەمنی نوویگ لە وڵاتەگە دویای هاتنەوەی موستەفا کازمی سەرۆک وەزیران لە واشینتون، و ئاشکرای هووکارەیلی کرد.
عەقیل ردەینی سەرکردە لە هاوپەیمانەگە، ئەرا ئاژانس شەفەق نیوز وت: قەیرانەیلیگ سیاسی و ئەمنی و قەیرانەیلیگ تر چەوەڕی موستەفا کازمی کەن، لە وەخت هاتنەوەی لە واشینتون، لەوەر رەتکردن ئەنجامەیل سەردانەگە لەلایەن بەشیگ لە لایەنە سیاسیەگان و باڵە چەکدارەگان.
ودیاریکرد؛ شایەت بەرزەوبوین گەورایگ بوود لە کارەیل بمباران و ئامانجکردن بەرژەوەنیە ئەمریکیەگان لە عراق، بەڵکم لە خوەد وەختەگە ئەیە لەبان کازمی خوەی مینێد، لە رەفتارەگەی وەگەرد ئەو لایەنەیلە وتواناگەی لە ئارام کردنیان.