ئایا واران دەسکرت لە عراق بوود؟
شەفەق نیوز/ دەسەی کەشناسی عراق، ئمڕوو دووشەممە، ئاشکرای ئەوە کرد ک عراق توانای دروسکردن واران دەسکرت دیرێد، و هەمیش هوکارەیل وەردەوامی بەرزەوبوین پلەی گەرمی لە وڵاتەگە دیاری کرد.
عامر جبوری قسەکەر دەسەگە وت: عراق چڕوپڕی لە پلەی گەرمی دیرێد، هەرچەن کاریگەری پارچەی وەرزی لەبان وڵاتەگە نەمەنیە، ک بەغداد پایتەخت دویەکە ٣٨ پلەی توومار کرد، و لە پارێزگایل باشوور رەسیە ٣٧ تا ٤١ پلەی سیلیزی.
وتیش: تا ئیسە هیچ بڵاوکردنیگ یا زانیارییە لە بەش کەشناسی نەهاتیە ک وڵاتەگە کەفێدە وەر سەردی یا واران کەی رووژەیل ئایندە.
وتیش: داوەزین گەرمی لەمانگ تەشرین دویەم دەسوەپی کەێد و وارانەگە کەم تا ناوڕاس بوود و تا مانگ شوبات وەردەوام بوود، و بایەت بوی گەرمی لە سەرەتای ئی مانگە داوەزێاد، باوجی هویچیگ ئاڵشت نەوی.
دیاری کرد ک گرفت مەنەین گەرمیەگە لەوەر چەن هوکاریگ بویە، جویر کەم وارانی لە وەرز گوزەشتە و سەرەتای ئی وەرزە، و هشکەوبوین چەمەیل و ترتەوبوین خوەڵەگە، و نەوین چواردەور سەوز.
وتیش: دەوڵەتەیل خەلیج پەنا وە واران دەسکرت بردن، عراقیش ئی توانا دیرێد.
وتیش: بەشیگ لە دەسەیل وەزارەت سامانەیل ئاوی و ژینگە و وەزارەت کشتوکاڵی دووپات کەسن ک واران دەسکرت ماوەی دیارییگ خوازێد جویر گردەوبوین ئەورەیل نزیک ک واران هاپیانەو، ئەوەیش لە وەرز زمسان بوود.
