ئامارەیل فەرمی: داوەزین تیژیگ لە بەرهەمهاوردن سەوزەیل لە عراق لەماوەی 2025

شەفەق نیوز- بەغداد

دەسەی ئامار و سیستەمەیل زانیاری جوگرافی لە وەزارەت پلانداین، ئمڕوو شەممە، راگەیان لە توومارکردن داوەزینیگ نیمچە گشتی لە بەرهەمه لاوەکیەیل و سەوزەیل لەماوەی ساڵ 2025 وە وەراورد وە ساڵ 2024، و ئەوەیش گلەودا ئەرا سنووردارکردنەیل ئاویاری، و کەمەوبوین بەشە ئاویەیل، و سەختیەیل ژینگەیی و کەشوهەوایی.

 وەپای راپۆرت ئامار ساڵانەی لە وەڕێوەبەرایەتی ئامار کشاوەرزی، کە ئاژانس شەفەق نیوز وەپیا چگ، بەرهەمهاوردن تەماتە ئەرا 258.7 هەزار تەن داوەزیە، لە وەرانوەر 463.7 هەزار تەن لە ساڵ 2024، وە داوەزینیگ کە رەسیەسە 44.2%، لە وەختیگ بەرهەمهاوردن شامی وە ریژەی 42.5% ئەرا 164.5 هەزار تەن داوەزیە، و کاڵەک وە ریژەی 47.5% ئەرا 66.5 هەزار تەن.

 راپۆرتەگە هەمیش وت کە بەرهەمهاوردن "بامیە" وە ریژەی 48.2% داوەزیە، و باینجان وە ریژەی 58.3%، و خەیار وە ریژەی 51.9%، لە وەختیگ بەرهەمهاوردن دارەیل گەوراترین ریژەی داوەزین توومار کرد، کە رەسیە 88.2%، هەرلیوا وەرهەمهاوردن پاقلەی سەوز وە ریژەی 33.7% داوەزیە، و جەت لەوەڕ وە ریژەی 18.5%.

 راپۆرتەگە دیاری کرد کە رووپیویەگە 15 پارێزگای عراقی گردیەسەو، بیجگە لە پارێزگایەیل هەرێم کوردستان، و پشت وە سەردانە مەیدانییەیل ئەرا کشاوەرزەیل و شیواز نموونە رێکخستیاگەیل بەساس وە هەماهەنگی وەرد وەزارەت کشاوەرزی، وە ئامانج مەزەنەی ئەو رووبەرە کاڵیایەیلە و بەرهەمهاوردن کردەیی ئەرا بەرهەم کشتوکاڵی.