ئاماریگ دڵتەزن.. ١٤ کوشیان و ١٠ زەخمداری وە رویداوەیل هاتوچو ٢٤ ساعەت گوزەشتە لە عراق
شەفەق نیوز/ وەڕێەوبەرایەتی هاتوچو گشتی، ئمڕوو شەممە، کوشیان و زەخمداری ٢٤ کەس لە ماوەی ٢٤ سەعات گوزەشتە وە رویداوەیل هاتوچو جیاجیا لە ناوچەیل وڵاتەگە بیجگە هەرێم کوردستان راگەیان.
وەڕێەوبەرایەتیەگە لە بەیاننامەیگ ئامار رویداوەیل ئەو ساعەتەیلە بڵاو کرد.
بەیاننامەگە وت: رویداویگ لەیەکدان لەبان ری میسان – بەسرە نزیک قەزای قەلعەت ساڵح کەفتنە ناوبەین ماشینیگ هۆندای ستاركس و ماشینیگ مارسیدس ئەکترۆز ترێلە، بویە هووکار کوشیان نۆ کەس و زەخمداری هەیشت کەس.
بەیاننامەگە وتیش: رویداو پلیان ماشینیگ لە پارێزگای نەینەوا جادەی قسور لە مووسڵ بویە هووکار زەخمداری کەسیگ.
بەیاننامەگە باس رویداویگ لەیەکدان لەپارێزگای دیوانیە کرد ناوبەین سێ ماشین بویە لە ناو شار دیوانیە، وەرانوەر دەروازەی سەرەکی زانکۆی قادسیە، یەکەم ماشینەگە پیکاب گرێت ووڵ بویە و دویەمەگە مارکەی چیلی، و سێیەمەگە کەیای ئۆبتیما، تەنیا زەرەد دارایی رەسانیە.
وتیش: رویداو لەیەکدان لە پارێزگای بەغداد/ کەرخ لەبان ری زوینەی فڕۆکەخانە کەفتیەسە ناوبەین دوو ماشین، یەکەمیان ئەلەنترا تەکسی بویە و ئەوەکە ئەکسینت تایبەت، ک بویەسە هووکار کوشیان دوو کەس و زەخمداری کەسیگ.
هەرلیوا، سەرچەوەیگ ئەمنی ئەرا ئاژانس شەفەق نیوز وت: دوو کەسیش وە رویداو لەیەکدان دوو ماشین لەبان ری بەغدا-تکریت لەوەر واران و تەم گیانیان لەدەسدانە.
