پارێزگایگ عراقی شمارەیل رخبەریگ لە خوەیکوشتنەیل ٢٠٢١ توومار کەێد
شەفەق نیوز/ ریخریاییگ مەدەنی پسپۆر، ئمڕوو شەممە، ئاشکرای ئامارەیل رخبەریگ لە رۊداوەیل خوەیکوشتن لە ماوەی ساڵ ٢٠٢١ کرد، و هەمیش هووکارەیل خوەیکوشتن وە گرفتەیلیگ دەرۊنی و رووژگوزەرانی دانا، و بانگواز ئەرا دەسکردن وە پلانیگ کۆمەڵایەتی و حکومەتی ئەرا نواگردن ئی گرفتە کرد.
تاڵیب حەسەن خەزرەجی ئەرا ئاژانس شەفەق نیوز وت: پارێزگاگە ٨٨ تەقەلای خوەیکوشتن لەماوەی ساڵ ٢٠٢١ وەخوەی دی، فرەگەی لەناو ژن و دۊتەیل بۊ، و لەوەر کارەیلیگ جیاجیا. خەزرەجی وتیش: پارێزگاگە ٣٤ تەقەلای خوەیکوشتن توومار کرد، ٣٣ لەلیان ئەرا ژن بۊ و یەکیگ پیاو، و ٥٤ خوەیکوشتن رەسیە مردن؛ ٣٤ ئەرا ما و ١٧ ئەرا نیر.
و دیاری کرد ک خوەیکوشتنەیلە وە سێدارە و دەرمان بۊ، و نیرەیلە وە گولە وسێدارە خوەیان کوشتنە، وتیش؛ خوەیکوشتن وە هووشبەری توومار نەکریاگە.
خەزرەجی دیاری کرد ک زاقترین هووکارەیل خوەیکوشتن لە پارێزگاگە لەوەر ژیان و گوزەرانی و گرفتەیل کۆمەڵایەتی وەگەرد کاریگەری خراو لە سۆشیال میدیا ک هان لە تونوتیژی و کەلتوور خوەیکوشتن دەن.
وەڕیەوبەر ریخریاگ دیالە ئەرا ماف مرۆڤ باس رووداوەیل تاوانی کرد ک وەبان خوەیکوشتن توومار کریا، وەلی لێکۆڵینەوەیلە ئاشکرای راسیەگە کردن، و داوا لە دەسەڵاتەیل دادوەری کردن بچنە بندروس رۊداوەیل خوەیکوشتن تا تێکڵای تاوانەیلە نەکریەن.
خەزرەجی بانگواز ئەرا دەسکردن وە پلانیگ کۆمەڵایەتی تەواو ناوبەین ریخریایەیل و فەرمانگەیل پۆلیس و تەندروسی و داد کرد ئەرا نواگردن گرفت خوەیکوشتن، وە هەڵمەتەیل هوشیارکردن و بەسیان گشت میدیایل هاندەر ئەرا بەڕەڵایی و تونوتیژی کۆمەڵایەتی.
