200 كه‌سايه‌تى له "ئال شێخ" سعودى: مير قه‌ته‌ر وه‌هابى نيه
شه‌فه‌ق نيوز/ رووژنامه‌ێ عه‌كاز باس له‌وه كرد و وت: له گام تازه‌يگ دوياى رووژه‌يليگ له به‌رپابوين قه‌يران دبلۆماسى له ناونى قه‌ته‌ر و سعوديه، 200 كه‌سايه‌تى سه‌ر وه ئال شێخ له سعوديه به‌ياننامه‌يگ ده‌ركردنه و له‌تى نه‌سه‌ب شێخ تميم بن حه‌مه‌د ئال دويه‌م مير قه‌ته‌ر ئه‌را شێخ محه‌مه‌د بن عه‌بدولوه‌هاب دامه‌زرنه‌ر بنه‌ماڵه‌ى وه‌هابى خستنه‌سه دروو.
رووژنامه‌گه ئاشكراى ئه‌وه كرد ك كه‌سايه‌تيه‌يليگ پايه‌به‌رز له ئال شێخ و له ناونيانيش شێخ عه‌بدولعه‌زيز ئال شێخ فه‌تواده‌ر سعودى و عه‌بدوڵڵا ئال شێخ سه‌رۆك ئه‌نجومه‌ن شوورا و شێخ ساڵح ئال شێخ وه‌زير كاروبار ئسلامى ئمزاى ئه‌و به‌ياننامه كردنه‌و له‌تى وتنه: له‌ى رووژه‌يله بڕيگ قسه‌وباس دروو ئه‌كريه‌ێد و كه‌سه‌يليگ نه‌سه‌بيان ئه‌را شێخ محه‌مه‌د عه‌بدولوه‌هاب باپيره‌مان به‌نه‌و، هه‌ر له‌وه‌ر ئه‌وه‌يش گشت ئه‌و دعايه‌يله ئه‌خه‌يمنه دروو.
بنه‌ماڵه‌ى ئال شێخ له به‌ياننامه‌گه ئاشكراى يه‌يش كردنه ك نه‌سه‌ب بنه‌ماڵه‌گه‌يان له شێخ محه‌مه‌د عه‌بدولوه‌هاب پيكهاتگه له چوار كوڕ: حه‌سه‌ن، حسێن، عه‌لى، عه‌بدوڵڵا و زوڕيه‌ت هه‌ركاميگ له‌ليان وه ئال حه‌سه‌ن و ئال حسێن و ئال عه‌لى و ئال عه‌بدوڵڵا ناسريانه‌و هه‌ركه‌سيگ باس له‌وه ئه‌كا بنه‌چه‌كى ئه‌چێده‌و ئه‌را شێخ له ده‌يشت ئى چوار بنه‌ماڵه له‌ناو شانشين سعودى و ده‌يشت وڵاته‌گه درووه‌و له‌ڕاسى دويره جوور ئه‌وه‌گ مير يه‌كيگ له ده‌وڵه‌ته‌يل كه‌نداو ك مزگفتيگ وه‌ناو شێخ محه‌مه‌د عه‌بدولوه‌هاب دروس كردگه‌و ئويشێد باپيره‌مه.
جى باسه، رووژنامه‌ى عه‌كاز جه‌خت له‌وه‌يش كرد و وت: مه‌رام له گوزاره‌ێ "مير يه‌كيگ له ده‌وڵه‌ته‌يل كه‌نداو" مير قه‌ته‌ره.
