100 ملیار دۆلار زەرەدمەن ئەمریکا کردگە .. دیموکراتەیل خوەیان ئامادە کەن ئەرا کووتاییهاوردن وە جەنگ ترمپ لەبان ئیران
شەفەق نیوز - واشنتۆن
دیموکراتەیل لەناو ئەنجومەن پیرەیل ئەمریکی نیاز دیرن پرۆژەی یاسای دەسەڵاتەیل جەنگ پیشکەش بکەن ئەرا کووتاییهاوردن وەو جەنگە کە سەرۆک دۆناڵد ترمپ لە دژ ئیران وەڕیەو بەێد، و بۊسە مدوو ئەوەگ واشنتۆن بڕە پۊلەیلیگ فرە خەرج بکەێد.
سەرکردەی دیموکراتەیل لە ئەنجومەن پیرەیل چاک شومەر، لە بڵاوکریاییگ لەبان سەکوو "ئێکس" وت، "ترمپ وەردەوام تەقلا دەێد لە بڕ خەرجەیل جەنگەگەی لەبان ئیران کەمەو بکەێد، وەلی هاووڵاتییەیل ئەمریکی ئاسایی تویش فرەتر لە 100 ملیار دۆلار کردیە وە مدوو بەرزەوبۊن نرخەیل سزەمەنی".
شومەر وتیش کە "فراکسیۆن دیموکراتەیل لە ئەنجومەن پیرەیل وەردەوام بوود لە کارکردن ئەرا پەسەنکردن یاسای دەسەڵاتەیل جەنگ ئەرا کووتاییهاوردن وە جەنگ لە ئیران، و گلەوداین سەربازەیل ئەرا وڵاتە یەکگرتگەیل، و کەمەوکردن خەرج لەبان گەل ئەمریکی".
ئی هەڵویستە هاوەخت تیەێد وەگەرد دەنگدانیگ کە ئەنجومەن پیرەیل، سێشەممەی گوزەشتە وەخوەیەو دی، لە قازانج رێکاریگ کە سەرۆک ترمپ ناچار کەێد وە کووتاییهاوردن وە جەنگ لەبان ئیران، ئەوەگ نۊنەرایەتی سەرکۆنەکردنیگ سیاسی تون کەێد ئەرا شیوەی رەفتارکردن ئیدارەگە وەرد قەیرانەگە، ئەوەیش وەرجە چەن هەفتەیگ کەم لە هەڵوژاردنەیل نووەوکردن ناوڕاس، وەپەی توڕ "CNN" ئەمریکی.
