ژمارەی پەیمانەیی نوویگ لە تووشهاتن رووژانەی کۆڕۆنا لە ئەمریکا
![ژمارەی پەیمانەیی نوویگ لە تووشهاتن رووژانەی کۆڕۆنا لە ئەمریکا](https://media.shafaq.com/media/ieubxn4y/2020-05-27t000000z_1881895968_rc24xg9t370i_rtrmadp_3_health-coronavirus-usa.jpeg)
شەفەق نیوز/ ئەمریکا ٧٥ هەزار تووشهاتن نوو وە کۆرۆنا تۆمارکرد، ک زیایبوین رووژانەی پەیمانەییگە ئەرا هەفتەمین جار لەی مانگە، وەگورەی ئامار رۆیتەرز.
و هەمیش مردن لە وەر پەتای ڤایڕۆس کۆڕۆنا لە زیایبوینە، و لەماوەیل دویایین رەسیە بەرزترین ئاستەیلی لە سەرەتای حوزەیران لە ولایەتەیلیگ جوور ئەریزۆنا وکالیفۆڕنیا و فلۆڕیدا و تیکساس.
٣٠ ولایەت لە پەنجا ولایەتەیل ئەمریکا، زیایبوینیگ پەیمانەیی لە هەژمار تووشهاتگەیل تۆمارکردن لە ماوەی یەک رووژ لەی مانگە، و لەبنەمای شیکردنەوەی رۆیتەرز ئەرا تووشهاتن دوو هەفتەی دویایین وە بەراوردی وەل دوو هەفتەیل گوزەیشتە، گواستنەوەی پەتاگە زیایەوبویە لە گشت ولایەتەگان.
ئەگەر فلۆریدا وڵاتیگ دویاتاد، وەنە رەسیە پلەی چوارەم لە جهان لە گەوراترین هەژمار لە تووشهاتنە نووەگان لە یەک رووژ، دویای ئەمریکا و بەڕازیل و هیند.
لە باوەتەیلیگ جوور دووارە کردنەوەی مەکتەبەیل و کارەیل و وەکارهاوردن دەمامەک لە شوونە گشتیەگان، ئەمریکیەگان لەلی بەشەبەشەو بوینە، و نزیکەی گشت پسپۆڕەیل تەندروسی لە جهان رێککەفتنە ک وەکارهاوردن دەمامەک جوور وەهێزترین کار لە نواگردن گواستنەوەی ڤایڕۆسەگەس، ک گیان زیاتر لە ١٣٤ هەزار ئەمریکی سەند.
ژمارەی تووشهاتنە نووەگان رەسیە ٧٥٢٥٥ تووشهاتگ، ک رەدکەێد لە ژمارە پەیمانیە وەرینەگەی رووژ جمعە، وەختا ژمارەی تووشهاتنەگان رەسیە٦٩٠٧٠ تووشهاتگ.