په‌مپيۆ سێشه‌ممه‌ى ئاينده ده‌س ئه‌كاده گه‌شته هه‌رێميه‌گه‌ێ ئه‌را 8 پايته‌خت عه‌ره‌بى
شه‌فه‌ق نيوز/ مايك په‌مپيۆ وه‌زير خارجيه‌ى ئه‌مريكى، ده‌س ئه‌كاده گه‌شتيگ له ناوچه‌ى عه‌ره‌بى و له‌تى سه‌ردان هه‌يشت پايته‌خت عه‌ره‌بى ئه‌كا ئه‌را تاوتوێكرن دوسيه‌يل گرنگ له‌باره‌ى بارودوخ سورياو يه‌مه‌ن و وسيان له‌ڕوێ ده‌خاڵه‌ته‌يل ئيران له كاروبار وڵاته‌يل هاوساو مه‌سه‌له‌يل تر هاوكارى له بوار دژ وه تيرۆر و په‌يوه‌نديه‌يل بازرگانى و وه‌به‌رهاوردن.
وه‌زارت خارجيه‌ى ئه‌مريكى له به‌ياننامه‌يگ وت: په‌مپيۆ له 8 يه‌ناير/ كانون دويه‌م تا 15ى هه‌مان مانگ سه‌ردان سعوديه‌و ئوردن و مسر و به‌حره‌ين و ئيمارات و قه‌ته‌ر و عومان و كوه‌يت ئه‌كا.
جى باسه، په‌مپيۆ له‌ى سه‌ردانيه ئه‌را ئه‌و وڵاته‌يله دڵنياييش ئه‌ياده هاوپه‌يمان و هاوبه‌شه‌يل و سه‌ركرده‌يل ده‌وڵه‌ته‌يل له‌باره‌ى رۆڵ ئه‌مريكا له ناوچه‌گه له‌ساێ ئه‌و بڕياره‌يل له‌ناكاوه ك دۆناڵد تره‌مپ داره‌ى سه‌باره‌ت وه كيشاننه‌وه‌ى هيزه‌يل ئه‌مريكى و ئه‌و هه‌ڕه‌شه‌و مه‌ترسيه‌يله ك په‌يوه‌سه وه‌پيه‌و.
