وە هاز 6.9 پلە.. زەویەلەرزەیگ دەێد لە شاریگ رووسی

شەفەق نیوز- مۆسکۆ

شەفەق ئمڕوو جمعە، زەویەلەرزەیگ وە تونی 6.9 پلە لەبان پەیمانەی رێختەر، دا لە باشوور نیمچە دورگەی کامچاتکا لە خوەرهەڵات دۊر رووسیا.

 وەپەی لق کامچاتکا ئەرا خزمەتگوزاری جیۆفیزیکی یەکگرتگ سەر وە ئەکادیمیای زانستەیل رووسی، زەویەلەرزەگە شەفەق ئمڕوو روی داگە.

وتیش کە سەنتەر زەویەلەرزەگە لەبان هشکانی بۊە وە دۊری 156 کیلۆمەتر لە باشوور خوەرئاوای شار پیترۆپاڤلۆڤسک-کامچاتسکیی پایتەخت هەرێمەگە، و وە قۊلی 138 کیلۆمەتر.

وەپەی داتایەیل خزمەتگوزاری جیۆفیزیکی یەکگرتگ، دانیشتگەیل پیترۆپاڤلۆڤسک-کامچاتسکی هەس وە لەرزەیگ کردنە کە هازەگەی رەسێدە 5 پلە.

جێ باسە کە وەزارەت لەناکاوەیل رووسی، لە وەختیگ زویتر لەی مانگە، راگەیانۊد کە زانایەیل زەویەلەرزە 62 زەویەلەرزە لە کامچاتکا تومار کردنە لە ماوەی هەفتەیگ.