کوڕ نەتانیاهو وە پەلە ئەمریکا وەجیهیلێد دویای وەرگردن هەڕەشە لەبان گیانی
شەفەق نیوز ـ قودس
میدیای ئیسرائیلی راگەیان، «یائیر»، کوڕ سەرۆک وەزیرەیل ئیسرائیل بنیامین نەتانیاهو، وە پەلە لە ئەمریکا گلەوخوارد دویای ئەوەگ هەڕەشەی راستەوخوەی وەبان گیانی وەرگرد.
دەزگای ئاسایش ناوخوەی ئیسرائیل "شاباک"، لە بەیاننامەیگ وت: کوڕ نەتانیاهو لە ئەمریکا گلەوخوار ئەرا ئیسرائیل، وە مدوو "هەبوین هەڕەشەی گەپیگ ئەرا وەئامانجگردن ژیانی".
لە بەیاننامەگە ئاشکراکریا "لە دویای ئەوزەڵکردنەیل و دویای ئەنجامدان مەزەنەی ئەمنی، بڕیار دریا وە دەسمیەتی تیم ئەمنی کە وەرپرس پاراستنیە، زوی لە ناوچەگە دەریبکەێم و ئەرا ئیسرائیل گلیەوبدەێد".
"شاباک" سرووشت هەڕەشەگە یا سەرچەوەی ئاشکرانەکد، باوجی ئاشکراکردن کەیسەگە دویای چەن رووژیگ هات کە بنیامین نەتانیاهو راگەیاندبووی ئیران پلان دانابوی ئەرا ئامانجگردن یەکیگ لە دوو کوڕەگەی.
لە لایگتر ، تووڕ تەلەفزیۆنی ئەمریکی "نیوزماکس" وت: یائیر نەتانیاهو "ئامانجی پلان کوشتن گومانلێکریایگ ئیرانی" بویە لە ماوەی مەنن لە شار میامی لە ویلایەت فلۆریدا.
