وە پەلامار ئۆکرانیا وەبان شار بێلگۆرۆد رووسیا کوشیان و زەخمداری زیاتر لە ٥٠ کەس
![وە پەلامار ئۆکرانیا وەبان شار بێلگۆرۆد رووسیا کوشیان و زەخمداری زیاتر لە ٥٠ کەس](https://media.shafaq.com/media/arcella/1725110759158.jpg)
ڤیاچێسلاڤ گلادکۆڤ، پارێزگار بێلگۆرۆد وت: "37 لە زەخمدارەیل کە هەفت مناڵ لەناویان بوی ئەرا خەسەخانەیل شارەگە بریانە، کە 40 کیلۆمەتر لە باکوور سنوور ئۆکرانیا دویرە"، وەگورەی ماڵپەڕ حوڕە.
پارچە ڤیدیۆییگ کە لە سۆشیال میدیا بڵاو کریانە، کە لە ناو ماشینەگەو بڕیاس، و گوایە پەلامارەگە نشان دەێد، دەرکەێد ماشینیگ ترەک مەوقەی جویلەکردن لەبان رییگ تەقێدەو، دویای چەند چرکەیگ تەقینەوەیگ لە دیمەگەی ترەک ریەگە دیار دەێد، تا ئیسە ڕۆیتەرز نەتوەنست راسی ڤیدیۆگە بچەسپێنێد.
وەزارەت دەرەوەی رووسیا ئەو پەلامارە شەرمەزار کرد.
وەزارەتەگە ئمڕوو شەممە راگەیان کە جاریگ ترەک داوا لە گشت حکومەتە وەرپرسەیل و لایەنە ناودەوڵەتییە پەیوەندیدارەیل کەیمن وە تونی ئیدانەی ئی پەلامار تیرۆریستییە دڕندانە بکەن و وە ئاشکرا خوەیان لە رژیم کیێڤ و سپۆنسەرە خوەرئاواییەیلی کە تاوانیگ لەیجویرە ئەنجام دەن دویر بخەن.
وەزارەتەگە وتیش: "ئۆپەراسیۆنە سەربازییە تایبەتەگەی" رووسیا وەردەوامە تا ئەو وەختە کە گشت ئامانجەیلی وەدەس بارێد، لەناویان "ماڵین چەک و نەهیشتن نازیزم" لە ئۆکرانیا.
دەسەی لێکۆڵینەوەی رووسیا لە کەناڵ تێلێگرام خوەی راگەیان کە لێکۆڵینەوەی تاوانکاری ئەرا پەلامارەگەی بێلگۆرۆد واز کردگە.
دەسەڵاتدارەیل وتنیش: رووژ شەممە لە مەوقەی گورزەیل ئۆکرانیا وەبان شار سنووری شیپکینۆ لە ناوچەی بێلگۆرۆد، ژنیگ زەخمدار بویە.