وەزیر وەرگری ئیسرائیل: ئادەیمن ئەرا پەلامارداین ئیران
2021-08-05T09:35:14+00:00
شەفەق نیوز/ بینی گانتس وەزیر وەرگری ئیسرائیل، ئمڕوو پەنجشەممە، ئامادەبوینی ئەرا پەلاماریگ سەربازی لەبان ئیران راگەیان، ک باسی وە کرفتیگ جهانی کرد.
گانتس لە گفتوگۆیگ وەگەرد تووڕ Ynet خەوەری لە بان پرسیاریگ ک ئایا ئیسرائیل ئامادەس پەلامار ئیران بەێد، ئەوەیش دویای خەوەریگ رۆژنامەوانی گوایە تەنیا ١٠ هەفتەی مەنیە تا پێکهاتەیل ئەرا دروسکردن بومب نەوەوی بکەفێدە دەسی.
گانتس وت: بیگومان ک ئیران تەقەلا دەێد نوای ئیسرائیل لە چەن چینیگ بەێد تا پاڵپشتی دەسەڵاتی لە لوبنان و غەزە بکەێد و هەزەیلی لە سوریا و عراق بڵاو بکەێد، و هەمیش پشتگیری حووسیەیلەی یەمەن کەێد.
وەزیر وەرگری ئیسرائیل باس ئەوە کرد ک دەوڵەت عبری ئامادەس لە چینەیل جووراجور لە نوای ئیران بوسیەێد، وتیش؛ بایەتە تەل ئەبیب تاونایلی لەی چینە بتەو بکەێد چوینکە کاریگەری لەبان دویارووزی دیرێد.
