وەزیر دەیشت عومانی سوو سەردان ئیران کەێد
شەفەق نیوز- تاران
قسەکەر وەزارەت دەیشت ئیرانی ئیسماعیل بەقائی، ئمڕوو دووشەممە، خەوەردا لە سەردانیگ چەوەڕیکریاگ ئەرا وەزیر دەیشت سوڵتاننشین عومان بەدر بوسەعیدی ئەرا تاران، سوو سێشەممە.
بەقائی، وەپای رۆیتەرز، زیاتر وت، کە "سەردان بوسەعیدی ئەرا تاران لە سوو تیەێد لەناو چوارچیوەی وەردەوامبۊن باسەیل لەباوەت تەنگەی هورمز، و باسکردن لە دۆسیەیل دووانی و هەرێمی و راوێژکردن لەبانیان لە چوارچیوەی قایمکردن هەماهەنگی ناوەین ئیران و سوڵتاننشین عومان".
رووژنامەی "نیۆیۆرک تایمز"، لە 4 ئاب/ ئۆگۆست ئیسە، ئاشکرا کردۊد کە ئیران و سوڵتاننشین عومان نزیکەو بوین لە رەسین وە رێککەفتنیگ لەباوەت لەنوو وازکردن تەنگەی هورمز وە تەواوی لەوەرانوەر جۊلەی بارهەڵگری، وەپای وەرپرسەیل ئیرانی و ئەمریکی.
ئیران و عومان لە حوزەیران/ یۆنیۆی گوزەشتە گرووپیگ کار هاوبەش دروس کردن ئەرا دانوسەنین لەباوەت دەریاوانی و خزمەتگوزارییەیل بارهەڵگری و وەڕێوەبردن ئاییندەیی ئەرا تەنگەگە، وەگەرد پەیمانداین وە هیشتن رێڕەوە ئاوییەگە چۊ "رێڕەویگ ئارام و واز" ئەرا بارهەڵگری ناودەوڵەتی، لە گامیگ کە ئارەزۊی هەردوگ لا نیشان دەێد ئەرا پەیاکردن چارەسەرەیل کردەیی کە دڵنیایی لە وەردەوامبۊن دەریاوانی لەی رێڕەوە زینگە کەێد.
ئی سەردانە هاوەخت وەگەرد جۊلەیل دیپلۆماسی تیەێد کە پاکستان سەرکردایەتیی کەێد کە مەزەنە کریەێد ئمڕوو دوشەممە سەرکردەی سوپا عاسیم مونیر کل بکەێد لە تەقەلایگ ئەرا شکانن ئەو گیچەڵەیلە کە تۊش دانوسەنینەیل ناوەین واشنتن و تاران بۊە ئەرا کووتاییهاوردن وە جەنگەگە.
