وەگەرد ناڕەزایی کراکارەیل.. وەزیریگ ئیرانی دەس لە پۆستەگەی کیشێد

شەفەق نیوز/ حوجەتوڵا عەبدولمەلکی وەزیر کار ئیران، ئمڕوو سێشەممە، دەسکیشانی لە پۆستەگەی راگەیان، وەگەرد ناڕەزایی کراکارەیل لەبان ژیان و گوزەرانیان.   

عەبدولمەلکی پەیامیگ ئەرا سەرۆک کۆمار ئێران ئیبراهیم رەئیسی نویسان، لەناوی دەسکیشانی وەخاتر زیایکردن هەماهەنگی لە کار حکومەت خستە وەردەس.  

وەزیرەگە لە پەیامەگەی نویسان: لە ماوەی ٣٠٠ رووژ لە وەرگردن پۆست وەزارەت کار گشت تەقەلایگ ئەرا پیشکەشکردن خزمەتگوزاری وەگشت راسییگ ئەرا گەل مەزن ئیران دا، وهەمیش سوپاس هاوڕیەیلی لە وەزارەتەگە کرد ئەرا پاڵپشتیکردنی وە درویژی ماوەی وەزارەتەگەی.